天津渤海銀行終於趕及喺05年最後一日（12月31日），正式掛牌成立，主席由羊子林（圖右二）大熱當選，馬騰為行政總裁，銀行會喺今個月中正式營業，開業初會先集中發展環渤海地區的業務。
羊子林大家應該好熟，話唔定銀包內有啲銀紙重係佢簽名嘅，呢位老金融，在中行25年，曾南調香港，擔任中行副董事長兼香港分行總經理，重做過香港銀行公會主席。喺佢任內，先後有13家中資銀行改制，為建立中銀香港（2388）奠定了基礎。99年佢北調中國進出口銀行做董事長，到去年才退休，點知家吓又再走馬上任。喺中國銀行做得咁耐，一定好叻又好清廉。
講番渤海銀行，呢間係中國第一家在發起階段便引入海外股東嘅商業銀行，亦係96年以來中國新批准設立的第一家全國性股份制商業銀行，也是首家總部位於天津的全國性商業銀行。天津泰達投資控股擁有25%股權；渣打銀行（香港）擁有19.99%股權，分別為第一及第二大股東。