梁敏儀一屋曲架家族，成員包括狗爸爸阿曲和動如脫兔的狗女Copy與番梘，三隻蠱惑狗無惡不作，爭玩具、拆門撞牆、鬥咬主人名牌袋等，然後詐儍扮瞓，每次都要主人絞盡腦汁尋真兇。
梁敏儀養了三隻曲架，包括六歲狗爸爸阿曲、同為三歲半的狗女Copy及番梘，曲架媽媽就送了給友人飼養。日前梁敏儀帶三隻愛犬到灣仔住所附近散步，老竇阿曲老成持重，喜扮蠟像假狗，兩隻狗女就非常活潑，經常狗咬狗骨，互相追逐。
梁敏儀與三隻愛犬的感情很深，她笑說早年本來只買了阿曲，後來睇中另一頭曲架狗女，豈料買了狗女回家後就出事，梁敏儀說：「嗰晚我嗌極兩隻狗都冇反應，後尾走出廳度睇啦，原來佢兩個喺度偷情，已經分開唔到啦，咁生米煮成熟飯，狗女重有咗BB。」
做錯事即詐瞓
梁敏儀續說：「嗰時我就問人，狗懷孕要食啲乜嘢好，寵物店啲人教我蒸魚，蒸熟大眼雞、去皮，連肉連汁撈狗糧，咁到狗BB出世時，媽咪就會夠奶畀佢哋飲，結果真係OK喎。」
兩隻狗BB女長大後很百厭，梁敏儀形容黑毛Copy一見番梘就「𡁻」，家中總是熱鬧非常，她說：「佢哋會爭玩具，好爛玩，爸爸善良啲，鍾意同人溝通；Copy就好神經質，好容易情緒波動，過度活躍；番梘就最嗲、會黐人。佢哋有時都會百厭，試過撞爛房門，道門就穿咗個窿、LV長銀包就崩咗個角，高跟鞋嘅鞋踭就咬花晒，不過每次佢哋梗係若無其事扮瞓覺，次次要搵真兇，但我懷疑三隻都有份。」
美容架生齊備
每天早、午、晚梁敏儀都會帶愛犬出外大、小二便，家中更齊備愛犬美容工具，她說：「我自己同佢哋剪毛，狗嘅剪毛機、吹風機都有，買齊晒架生，一次過買可能好貴，但每次帶一隻狗去洗剪恤都成五百蚊，長遠計平好多。」
採訪：朱倬誼 攝影：陳慧安
