○二年度港姐亞軍左慧琪，前年年初返回英國繼續大學課程，去年九月畢業，並取得工商管理系一級榮譽學位。左慧琪畢業後即成為各大機構的羅致對象，她選擇當健身中心公關，打算吸取工作經驗後再戰娛樂圈。
左慧琪日前返港探親度假，並接受本報專訪。問她可打算返港再戰娛樂圈時，左慧琪笑說：「都有咁嘅打算㗎！始終屋企人都喺香港，希望遲啲有機會拍吓電影或者拍吓劇。其實我返英國之前都有幫TVB拍劇，飾演由外國返嚟香港嘅女仔，不過畢業之後即刻有公司搵我，我咪趁機會喺其他地方攞啲工作經驗先囉，況且我啱啱接咗份工做，如果做幾個月就話唔做，會畀人覺得我玩玩吓，所以起碼要做夠一年先至諗返唔返嚟香港。」
戥爹哋辛苦
左慧琪的警司父親左禮宜原來已由黃竹坑警察訓練學校調往灣仔警署執勤，上月反世貿示威者在灣仔引發大騷動，左父亦有參與維持秩序工作，左慧琪說：「雖然爹哋一直留守喺警署，但佢同前線嗰班警察一樣，都係幾十個鐘頭不眠不休，真係戥佢哋辛苦。大騷動嗰晚，我成晚睇住新聞報道，比起外國嘅警方，我覺得香港警察對待示威者已經好gentle（溫和），佢哋只係維持社會秩序啫，唔應該責怪佢哋，話佢哋使用暴力。」
採訪：戴彩煥 攝影：陳偉權
髮型：HairCulturebyByron
服裝：CalvinKlein 場地：CoffeeBerry
