一年話咁快就過，我阿利就嚟又大一歲，嗰頭又近咗一步。退咗休自然多嘢諗，唔係又邊得咁多嘢寫？一星期寫一次唔係嘢少。
呢幾日打開報紙，份份都話今年就業市場強勁，打工仔唔憂無嘢做，唔憂無人工加，尤其係會計，直情出現搶人潮。見到啲後生仔行家咁好景，我阿利都戥佢哋開心。會計就係這樣一種餓你唔死飽你唔親嘅行業，所以我當年讀書唔成，入工專讀過兩錢書，出嚟考個會計牌，咪卒之可以仔大女大，退休等埋單。
「得芹」出4萬蚊大利是
會計話就話好景，但相當分散，並非一面倒個個會計師發到豬頭咁。例如三、四年經驗貨仔嘅會計師就最搶手，全行都要呢班自動波，可以帶job，考完試，攞完牌嘅後生仔。各間大行搶人不特止，連commercial都要人。
搶成點？例如大行「得芹」，聽講話出到4皮嘢作為介紹費及開工利是，鼓勵員工幫手獵頭之餘，更鼓勵行家跳槽。
出銀彈唔在講，有啲重出埋慷慨。以前呢啲獎金要過檔員工做足半年甚至一年，才會過數。𠵱家？一返工就磅水，只會在做唔夠半年時扣番，息都畀你賺埋，筍唔筍？
後生仔只要有手有腳就大把人搶，老嘢就唔同世界。點唔同？下次再講。