吳文忻最近獲邀成為瘦身中心代言人，她經過近一個月內外夾攻的減肥療程後，揚言已踢走十磅肥膏，回復八年前選港姐時的體重，但為免上圍縮水，每晚都會塗香薰豐胸液保cup數。
吳文忻近期為名門瘦身形象中心擔任代言人，為期一年，日前她穿上三套不同款式的比堅尼泳衣，大騷減肥後標準身段。
抱狗保暖
拍照當日天氣乾燥，文忻自備超潤糖水，實行由內靚到外，而廣告商則找來一頭可愛貴婦狗充當特別嘉賓兼天然暖爐。
文忻前晚接受本報電話訪問時表示身形多年來難保穩定，時肥時瘦，元兇正是為食，她說：「我鍾意煮嘢食，又鍾意出街搵好嘢食，食足十二成，冇節制，好努力減一排，跟住又放棄一排。𠵱家有纖體公司督促住會好好多，我呢一個月嚟已經瘦咗十磅，由一百一十二磅減到一百零二磅，條腰由二十七吋變番二十四吋，返去我以前選美時咁瘦。」
既然文忻表示減肥成功，未知其上圍有否因而縮水？她笑說：「唔會，晚晚有搽香薰豐胸液，個胸要保住。」
心中有愧
其實今次令文忻的起心肝滅肥膏，源自去年出席無綫《獎門人》水着節目，她說：「吳君如講過，世上冇唔靚嘅女仔，只有懶嘅女仔，佢講得啱，我喺減肥方面真係一個懶人，做《獎門人》時，見番以前嘅同事係好有愧，我睇番以前肥嘅相，咁都可以做藝人有啲過份，𠵱家簽咗新經理人，又有纖體贊助，點都要keep住。」
採訪：朱倬誼
