聖誕過完，重有三個禮拜多啲就過年。中國人過年係大件事，有好多親朋戚友嚟拜年，點忙都要掃吓屋，以免失禮人，如果裝修就一定要過年前竣工，煲呔亦唔例外，二十九號之前佢一定會搬入禮賓府。
九七回歸之後，有人話上亞厘畢道呢間殖民地督轅大宅風水唔好，俾中銀大廈一把刀咁劈到正。又有人話呢度係英國殖民主子高高在上奴役中國人嘅地方，為咗去殖民化，唔可以住。於是有人建議攞嚟做博物館，有人建議用嚟擺壽酒，甚至有人話要改埋名叫紫廬……總之意見一大籮，董先生唔知點好，惟有租多個嘉慧園單位，幾大都唔搬。
眨吓眼七年過去，禮賓府日日丟空，杜鵑花開又好謝又好冇人理。卒之等到董生腳痛收工，煲呔黃袍加身，話之你乜嘢風水，草地照鏟魚池照起，一於同啲錦鯉一齊搬番落山。
咁煲呔會幾時搬呢？二十九號係年初一，之前有三個禮拜六日，一定係其中一日。八方四圍打聽，有高人話唔係十三號，因為嗰日係黑色星期五，所以係十四號。
最好呢個禮拜日搬
十四號？八方一查通勝，嗰日「日值歲破、大事勿用」噃。當年阿松唔信邪，揀正歲破嗰日宣讀預算案，結果一讀完就爆出偷步買車醜聞，落咗台，煲呔冇理由唔避開吓，若然趕得切，最好就呢個禮拜日搬，呢日係十二月初九，丁酉吉日，最宜遷徙。高人就話，煲呔信天主㗎，佢中銀把刀都唔怕，點會理呢啲嘢？
其實煲呔現時住緊嗰間白加道維多利亞宮都好正，除咗細啲之外，景觀重靚過禮賓府。但煲呔呢個月搬走之後，肥龍唔會搬嚟住，因為佢諗住自己大約做多一年就辭官，費事下屋搬上屋，所以等煲呔走人，就會將維宮略為裝修，將來用嚟招呼賓客。
禮賓府係咪要正名？
咁肥龍咁懶，禮頓山相連單位近馬場又近銅鑼灣，費事搞咁多嘢啦。
八方最好奇係煲呔入住之後，禮賓府使唔使正名叫做特首府呢？
爆料熱線：29290000、27860099
報料傳真：26239278
報料電郵：[email protected]