06年新嘅1年，好嘅開始，全日最低開市，全日最高收市，恒指進帳68點，又一次證明期指低水唔係壞事（除夕期指低水38點）。
成棚大隻銀行股，隻隻生猛。建行（939）、交行（3328）、中銀（2388）與滙控（005），全部似模似樣。銀行股個勢未完，搵相關C輪炒，等收狗年利是可也。
中銀C輪9777：個市流傳緊，中銀阿媽中行，會喺今年首季上市。中行上市前，定會做騷，就算唔做，炒家都會諗佢會做，而最佳辦法之一，就係炒高中銀。個仔生性，中行招股都會威水啲。中銀收15元，升0.10元，隨時升多一蚊幾毫過你睇。
搵中銀C輪炒，認住9777。隻輪6月初夠鐘，輪價73仙，溢價只係1.4%，槓桿率20.6倍（有效12.6倍），引伸波幅14.5%。正股升1元見16元計，隻輪原來值1.52元，有升1倍潛力，肥仔輪也。
滙控C輪4907：銀行股掂檔，唔會剩番滙控不動如山，買定滙控C輪。計來計去，4907最正斗，4月初夠鐘，輪價34仙，溢價1.2%，槓桿率36.7倍（有效20.4倍），引伸波幅12.3%。47球易手，完成柯打快過打針。
章盛