新一年最先跑出的股票，原來係大陸金融保險股，建設銀行（939）同埋交通銀行（3328）均見新高，至於中國人壽（2628）以及平安保險（2318）亦分別升咗2.9%同埋4.55%。
大陸金融股發威
經紀黃話，無論係人民幣升值或QDII是但一樣有消息，大陸金融股隨時會炒個不亦樂乎。
至於細價股方面亦見個別發展，例如早排公布收購咗一間上海A股公司滄州化工12%權益的百威國際（718），早排唞一唞後，昨日又升過，最高見0.244元，收0.237元，升咗9.22%，成交股數大增至2.36億股，金額5354.9萬元。
經紀陳話，百威昨日咁大成交，其中有5000萬股係非自動對盤，每股作價0.217元，據講又係有大戶進場之故，所以股價愈升愈有。
查實小初以前都講過，百威炒作咁耐，市值已升至12.19億銀，單單睇本身生意同埋呢批A股股權，唔知點樣可以支持咁高股價呢？
慕容小初