繼《Talesof》系列後，又輪到SE嘅《前線任務》（FrontMission）系列10周年了。回想10前第一代於超任登場時，筆者除咗鍾情佢個換Parts系統外，最勁Buy就係個射手射腳系統了！只要LV夠，隨時可瞄準敵人嘅手手腳腳瘋狂掃射，貪夠EXP先幫佢埋單，更可幾部Wanzer圍抽一個敵人，嗰種爽快得嚟帶點變態嘅玩法，比騙錢名作《機戰》實在好上不知多少倍！
記者：徐影龍
PROFILE
遊戲類型：SLG
對應機種：PS2
遊玩人數：1人
售價：$360
開發商：SquareEnix
售賣點：DreamStore（25753285）
地址：灣仔東方188商場256號舖
科幻式SLG有唔少，不過絕對係《前線任務》（下簡《FM》）將射手射腳系統發揚光大！每部機體分左右手、身體同腳4大HP，當身體HP降至0為之擊倒，最好玩並非KO敵人咁簡單，而係將敵機嘅手手腳腳逐忽擊破；射爆手佢還唔到拖、射爆腳佢又走唔遠，之後要劏要割悉隨尊便！最緊要係每爆敵方一件Parts都有EXP攞，咁嘅系統簡直係引導玩家化身「林過雲」，唔貪都對唔住自己啦！
手腳自由配搭
大家咪誤會《FM5》只係一隻美式變態射擊SLG，其實遊戲相當之有深度，唔單止每個行動都受AP值所限制，就算剛提及嘅「射手」玩法，都需一定程度運氣，除非角色配有「Focus」呢種Skill，重要等級有番咁上下，先可有較高命中率。
要說《FM》系列最為人受落一環，相信非自由配搭Wanzer部件莫屬了。新一集在換裝機體及配搭武器上，跟過往一樣分類，上集本已接近完美之換裝介面，今集作出更人性化之改良，所有買賣、裝配及變換Wanzer都設計得好就手，試裝唔同部件都可即時顯示，可快速裝配出有姿勢有實際之Wanzer！新加嘅改裝系統，用意係升級舊有部件，唔使下下買新嘢咁肉赤。玩過嘅都知，每次有新Parts出現，一次過6部機換件，加埋手手腳腳同武器，銀根比《機戰》更短絀。幸好今集仍有Arena（競技場）模式，讓玩家下注喺心愛Wanzer上出戰，勝出依賠率派彩，之後便可快快樂樂換裝去。
強化人物主題
筆者覺得《FM5》嘅戰鬥及換裝系統已十分之成熟，要搞新意思必定係向「人」埋手。廢除《FM3》嘅傷害機師系統後，來到今集玩捉迷藏，大量人物分布唔同地方，單單初期基地已有數十人跟你「詳談」，更要跟特定人物對話才可出擊過關或獲得新駕駛者，這招本來可令故事性大幅加強，讓玩家更為投入，可惜像筆者一樣對日文苦手者，只會覺得煩厭，情況比可以快速去片嘅《機戰》更無奈。
每個角色均有預設專長，包括格鬥、短程槍械、狙擊槍、遠程飛彈、回復型、電子干擾戰等六大類。筆者習慣依着設定去培育，擅長短程槍械便讓他揸機槍、散彈；最多有6名出擊隊員＋4名後備共10人，應可Cover所有機種喇。
Wanzer紙模型免費下載
跟《FM4》一樣，今作官方網站亦提供大量相關資訊，除十多款超高解像Wallpaper外（黑、白底色任擇），最正當然係Wanzer嘅紙模型下載啦！從網頁中已見到紙Wanzer製作得相當之精細，解壓後足足要Print成12張A4出嚟剪貼，完成品高度有20cm，比1:100嘅高達模型重要高！遺撼係武器只有左手格鬥，若果遲啲有埋來福槍、火箭炮、甚至其他替換Parts就好喇！
官網：www.square-enix.co.jp/fm/fm5/
新手入門攻略
《FM5》跟上作在系統上有九成相似，舊有Fans上手當然唔成問題，不過新手初玩嘅話，肯定被大堆數值及簡略詞所嚇怕！為免大家錯過呢隻咁正嘅Game，筆者今日就獻醜，簡略講吓一啲過關及Tune機心得：
1.遊戲初段可到訪地方已十分之多，總之習慣性每人起碼交談一次以上，隨時獲得額外Parts、虛擬任務或Wanzer機師。
2.購買裝備切戒「最貴就是好」，每種職業有相關優勢，如格鬥Wanzer就以「出力」優先，回復Wanzer就以HP先決。
3.唔好懶型隻隻Wanzer都雙手揸武器，因減輕重量能令攻擊力提升，即係單手格鬥重勁過雙手格鬥。（除非機師學懂Switch類雙手Skill）
4.逐個擊破乃不變定律，可以的話優先除去火箭、榴彈炮Wanzer。
5.格鬥技只消耗AP1，應以格鬥Wanzer作攻擊重心，盡量做到每次Link都有佢份。
6.今集新增流彈系統，真實感提升不少，不過要小心企正喺中間嘅同伴被誤中。
7.競技場賠率因應機體而變動，請將不必要Skill暫時除去，令賠率提升。
8.由於回復型及肩式武器型反擊效率極低，倒不如配備負重較輕嘅盾牌類，減輕損傷。
9.難以避免自軍鄰接而受到敵人流彈打中，就算狙擊系嘅來福槍都有機會射中同伴，玩家應多點注意，遇着呢種情形，便不要選擇還拖，累同伴食埋你嗰份。