講起日版手機，有邊個唔識得「903SH」個大名？雖然佢已成為香港玩家心目中嘅「機神」，不過喺日本人眼中，佢都未算勁！日前，一間著名嘅日本手機網站，就公布一項05年最受歡迎手機選舉結果。調查發現，約6,000名受訪網民當中，撐903SH嘅玩家僅佔131人，即2.29%，排名第12位；至於另一款大家同樣熟悉嘅703SH，更不入頭20位！據該網站報道，最受日本玩家歡迎嘅手機原來叫做W-ZERO3，得票率為27.55%，即達到1,576張選票！同樣出自SHARP手筆，與903、703唔同，W-ZERO3屬一款PDA手機，支援WindowsMobile5.0系統，更具備滑趟式Keyboard，咁嘅規格，喺SHARP手機可謂罕見！雖然日本只係出咗無幾耐，但幾時先輪到本港？睇怕要慢慢等喇！
文：尹謹基