近日接二連三的虐畜事件引起公眾關注，一班志願人士於周日（八日）發起反虐畜遊行，促請政府加重虐待動物刑罰。城中名人藝人包括傅明憲、何婉盈、古天樂、向海嵐和廖碧兒等紛紛響應，傅明憲更呼籲全城監察，舉報虐畜事件，以起阻嚇作用。
近日旺角三隻小貓被虐貓狂徒以極為變態及殘忍手法折斷四肢事件，引起公眾關注，身為愛護動物協會會長的傅明憲，昨日表示會全力支持周日（八日）下午二時在遮打花園舉行的「尊重生命及反虐殺動物大遊行」，她透露懸紅緝拿虐貓狂徒的賞金，在熱心人士捐獻下已由一萬增至二萬元。
隨時變暴力狂
傅明憲說：「唔少善長睇到虐貓報道後，主動打電話畀我哋話捐款，希望可以早日緝拿兇徒。我哋覺得現時虐殺動物嘅刑罰太輕，起唔到阻嚇作用，所以希望透過星期日嘅遊行向政府反映意見，提高刑罰。」
傅明憲續說：「虐貓事件後，我哋愛護動物協會已經有十個幫辦巡查超過一百次，但都冇辦法捉拿兇徒，所以希望發起全城監察，有發現即刻報警，或者打我哋嘅舉報電話2711-1000。呢個係社會問題，小朋友細細個虐待動物，大個咗之後分分鐘變成有暴力傾向，甚至變成罪犯。」
廖碧兒和向海嵐均表示若不用開工，便會去遊行，廖碧兒說：「因為我覺得香港市民遺棄寵物嘅情況好嚴重，將佢哋放喺一啲紙皮盒遺棄，呢啲行為好唔要得。」
何婉盈和古天樂也認為刑罰太輕，何婉盈說：「𠵱家嘅刑罰完全起唔到阻嚇作用，所以星期日我一定會去遊行，同埋我已經sendemail叫班朋友一齊嚟支持。」
刑罰輕難阻嚇
古天樂昨日在電話中說：「遊行當日我唔喺香港，但我會叫班朋友支持。我覺得刑罰方面，最緊要都係監禁，刑期長啲先至起到阻嚇作用，而且虐畜嘅人心理有問題，容乜易第日變態到殺人㗎！」
李珊珊則表示會推掉工作拉男友錢嘉樂一起去，她說：「我知班熱心人士曾經喺旺角撞見疑兇，疑兇一見佢哋就即刻走，後來熱心人士報警，但警方竟然話佢哋咁做係違反人權！」
採訪：戴彩煥、馮美茵
