當間間日本食店都標榜食材來自某某原產地時，作為行外人嘅消費者即你與我，講真都幾難分真假，新加入戰團的番屋就打正旗號賣正宗北海道菜，又懷疑堅定流？咁你聽住嘞，老闆係北海道人、店舖用北海道「漁夫之寶」裝飾、罕見北海道食材有巨型水八爪魚腳，呎幾長粗到攞嚟劈友都重得，咁嘅背景裝備同食材，斷估都信得過嘞啩？
記者：陳慧茵
攝影：何家亮
模特兒：Va、Carrie（Salvador）
老闆正宗北海道人
記得第一次踏足番屋正值世貿期間，全店職員正埋頭苦幹整緊世貿飯盒，無錯，就係開會班高官們有啖好食的世貿飯盒，細問，先知店舖賣嘅係北海道菜，老闆佐藤理來港6年，係正宗北海道人，開舖都專登搵番北海道鄉里幫手搵罕有食材，總廚島田則住港30年，經驗老到，見我對住成呎長的水八爪魚腳一臉問號，佢即時解畫：「好大條呵？日本北部水域先有呢啲水八爪魚，係全世界最大嘅八爪魚嚟㗎。」確實好粗好長，粗到當二呎四劈友用都重得。
番屋＝捕魚中途站
介紹完水八爪魚，怕怕醜醜千般不願上鏡的老闆終於出場，估唔到店名一樣有古講，佢話：「『番屋』（Ban-ya）係指百多年前漁民出海捕魚嘅中途站，我對北海道漁業有深厚情意結，所以特別托人搵好漁船設備裝飾間舖，唔少裝備只可以喺北海道博物館先見識到，全部都係有過百年歷史嘅『漁夫之寶』嚟㗎。」
水八爪魚刺身 5片$120
島田：「水八爪魚又叫深海八爪魚，生長喺日本北部水域，最大直徑有成3米，係全世界最巨型嘅八爪魚。」最佳食法係只灼熟八爪魚表面0.5cm，內裏肉質生吃，味道帶強烈海水味，口感煙韌極具𡁻頭。
鹽燒花魚 每條$120
北海道特產花魚產量稀少，漁民捕獲後會「一夜乾」，即時剖肚清內臟、用鹽水浸泡再風乾，最後急凍密封包裝運到香港，由於用鹽處理過，故直接燒烤最嘗到真味，新鮮花魚唔會一夾即散，肉質鮮嫩肉多骨少，伴蘿蔔茸同吃是日本傳統。
真鱈魚子刺身（後）天婦羅 各$90
北海道每年12月至2月開始盛產真鱈魚，雄性真鱈魚腹內的魚精含豐富蛋白質及維他命，日本人深信有壯陽功效，一條真鱈魚來貨價要千多元，十分貴氣，若嫌真鱈魚子刺身口感滑溜難接受，可改吃天婦羅，味道同樣甘甜，口感Creamy。
鹽燒鮮多春魚 2條$100
每年10月至12月中北海道多春魚當造，論身形，新鮮多春魚比醃製及曬乾的多春魚較肥大，肉質也較軟腍。一直以為多春魚一定有春，今次總算見到「無春多春魚」，一雄一雌新鮮多春魚鹽燒10分鐘後上碟，佐酒一流。
石狩鍋$250
以北海道三文魚、日本長葱、豆腐等材料伴以白麵豉湯底煮成的石狩鍋，大得足夠4人食用，北海道三文魚比挪威貨貴3倍，肉身較深色，油份較少，是罕見的當造食材。
橄欖汁伴和牛刺身 $80
新菜式，澳洲Grade5和牛刺身伴日本水菜及炸蒜片，集鮮、爽、香共冶一爐，入口即溶的牛肉夾雜濃濃的麻油及橄欖油香味，回味無窮。
北海道海鮮湯 $120
北海道流傳已久的海鮮湯，把牡丹蝦、帶子、鱈魚、溫泉蛋及長腳蟹等海鮮，放入用鹽、酒、木魚碎煮成的湯同煮約10分鐘，難得湯味鮮甜，食材亦保留到質感與鮮味。
昅埋「漁夫之寶」
食客有Say
番屋（BAN-YA）
地址：銅鑼灣渣甸街50號渣甸中心10樓
訂座電話：35808928
營業時間：12:00nn-3:00pm，6:00pm-11:00pm
座位：45個