坐擁多個商場嘅大業主新地，喺啱啱過咗嘅聖誕同除夕兩個周末，搞咗一連串嘅商場宣傳活動，𠵱家係時候公布成績。啱啱嘅元旦長假期，人流量最勁當然係新場觀塘apm，過百萬人流認真唔係講笑，其次係一年到晚都旺到飛起嘅沙田新城市廣場，九十八萬人流，比舊年多九個巴仙。
兩個頂級大場當然迫爆，中游分子都唔少嘢，經過大翻新嘅元朗廣場，三日有三十八萬，單係除夕倒數當晚，都有三千人，喺元朗嚟講算好勁。
將軍澳東港城都有三十五萬，比舊年勁升五成幾，聽講期間有個豪客一口氣用咗十五萬，買咗三部LCD電視㖭，邊個話消費市道睇多過買？至於尖沙嘴新太陽廣場，則有三十三萬，應該多得除夕夜倒數。