華華去鏞記（圖）食飯，一坐低就有夥計攞咗張傳單嚟，傳單上寫咗「請投鏞記一票」，直選？睇真啲，原來佢哋入選咗工展會搞嘅「香港服務名牌選舉」決賽。
公司入咗圍，班老夥計都好雀躍，但見到24個對手（見附表）包括中原地產、鴻星和東亞銀行等都有唔少分店，人多勢眾，佢哋就只得一間，一人一票實唔夠人哋多，所以好落力咁動員啲客，連鏞記嘅網站都叫人投票。
咁前日李國寶喺度開元旦Party，班夥計有冇叫佢支持？就算第一票投番畀東亞銀行，重有9票（每人選10個），可惜呢個選舉好「民主」，高官名人冇特權，否則咁多貴客，鏞記邊使驚。
華華上網站一睇，至噚日為止，最多人投嘅10個品牌（排名不分先後），鏞記同東亞銀行都榜上有名喎，其餘重有加州紅、卓悅和稻香等，睇嚟分店多或少都唔係關鍵，代表性同服務先係重點。有興趣投票嘅讀者都可以去以下嘅網站玩吓： http://www.hkbpe.com.hk/40th_hkbpe/hkpe_online_polling_html_CHI/top_service_polling.htm，呢個星期五就截止。