大除夕，歐美股市全部箭嘴向下，杜指跌67點。歐美股市下跌之前，港股先散169點，跌定先。06年港股紅盤，未必濕滯，嚟1鋪早跌晚穩唔出奇。
新年期間，內地傳媒報道，中行研究取消活期存款利率，係真唔係，唔清楚。如果成事，有利中行上市，亦有利交行（3328）與建行（939），活期存款唔畀息客戶，慳番0.72厘息，對增加利潤起立竿見影之效。買交行同建行C輪，有着數。
交行C輪9249：交行C輪33隻，有啲交投一片空白，有啲溢價太高，得隻9249啱睇，成交有49球，金額13球，最旺係呢隻，數據又靚。
9249今年2月初夠鐘，輪價26仙，溢價0.4%，槓桿率13.6倍（有效12.9倍），引伸波幅13.8%。
建行C輪2107：建行C輪較交銀C輪又勝一籌，皆因建行未來上升空間大過交銀。
揀建行C輪埋手，最靚始終係上周五推介嘅2107，今年6月初到期，輪價22.6仙，溢價4.7%，槓桿率12倍（有效8倍），引伸波幅21.4%。9971壽命長過2107兩個月，有效槓桿率與引伸波幅輸蝕，但要畀高2.7個百分點溢價，唔化算；兩者揀一，梗係取2107捨9971。
章盛