香港有90萬股民，就算唔炒股，都有樓有金有供強積金。社會富裕，啲人多少有啲投資，對財經資訊需求好大。今日開始，有線第8台正式定名為「財經資訊台」，提供更多即時訊息畀觀眾。吳老闆咁做，除咗配合市場需求，當然亦係為迎擊小小超嘅Now做準備。
Now近月氣勢好勁，PCCW賣大包，你肯用佢個電話，佢就送Now畀你免費試睇，客戶人數直迫有線。Now自己籌備財經新聞台已經埋好班，3月有得睇。佢哋挖咗無綫一批精英記者去，加上小小超要響頭炮一定不惜工本，所以有線不敢怠慢。事關打完財經台呢一仗，跟住就要打新聞台大戰。
對於中環人，即時財經新聞比一般新聞更加重要，因為關係身家也。好多上市公司中午宣布業績，又或者日頭開股東會同記者講嘢，呢啲都係重要資訊。雖然話返緊工未必方便睇電視，但可以在手機睇番，而銀行大堂如果好似九鐵咁肯畀有線裝機，咁就更加惠及大眾啦。
港台去年做咗個05年電視節目欣賞指數調查，在98個節目中，有線財經排第9，有線財經即時睇排20，反映觀眾好支持佢哋。正名後有乜秘密武器好快就知，如果做到深入淺出，無理由唔掂。可惜在Now嘅壓迫之下，有線就算節目幾出色，股價由4月時3蚊一直跌足3季，小股東未來都唔使有乜期望。
李華華