萬綺雯和編劇夫婿陳十三養了八隻貓，初期二人差點為了貓咪鬧婚變，幸好大團圓結局。住元朗獨立屋的萬綺雯，在花園加設玻璃屋給愛貓住，牠們又可從小門自由出入客廳，十分寫意。
萬綺雯和編劇夫婿陳十三都是愛貓之人，養了六隻家貓和兩隻混種波斯貓。為了讓愛貓有個安樂窩，住元朗獨立屋的萬綺雯在花園加設玻璃屋給貓咪，令牠們可從小門自由出入客廳。
貓咪蝦後母
萬綺雯受夫婿陳十三影響也喜歡貓，她說：「最初係老公養貓先，最先養嗰隻叫十四，不過十四好快死咗，之後養兩隻分別叫十五同Matthew，佢哋生咗一竇四隻貓，之後都係用數字嚟幫啲貓改名。跟住老公又陸續買多兩隻貓畀我，屋企就有八隻寶貝。」
陳十三與萬綺雯新婚時，貓咪都不肯接受這個「後母」，萬綺雯說：「佢哋專蝦我，淨係揀我啲鞋屙屎屙尿，又抓爛我啲衫，相處一年都改變唔到我哋嘅關係，於是我就同老公講數，問佢要老婆定要貓，我畀幾個月限期佢。點知搬咗新屋，貓咪去咗新環境，竟然唔再曳。」萬綺雯與八小福關係愈來愈好，所以結婚多年，夫婦倆仍未有造人大計。
訪問當日，萬綺雯的八隻愛貓都十分害羞，為了𠱁牠們圍在一起，萬綺雯即出動健康零食貓草，她說：「佢哋隊親呢啲貓草就好high。」
爭隊草打架
果然，八小福為了爭「隊草」竟打架，混種波斯貓把碟舔得乾乾淨淨，更整張臉瞓在碟上。
萬綺雯又為愛貓影了不少生活照，她說：「我希望將來有機會同出版社合作，出一本貓寫真，幫保護動物嘅機構籌款。」
採訪、攝影：比華利
