《蘋果》財經版最近收到頗多讀者來信，都係投訴以前逢禮拜日刊登嘅強積金報價排名表唔見咗，令佢哋好不便。其實唔係冇咗，而係由每周一次改為每月一次（最後一個禮拜日登，其他三個星期日改登其他資料）。做乜受歡迎都唔周周登？唉，咪就係冇咗啲資料囉，連基金公會都只係一個月得一次報價，啲基金公司睬《蘋果》都儍，我哋免費登佢都唔蘇你。
點解？表現好就唔介意你知，跌咗價就最好冚密。但強積金關係幾百萬人，在講求透明度的時代，咁嘅服務態度又點得呢，各位有供強積金嘅讀者，點解半年至有一次報表？點解報表咁難睇？咪唔想你睇得明囉。所以噚日見政府幫積金局發布呢張相（圖），話佢哋印咗好多小冊子宣傳，真係火滾，不如叫基金公司照顧吓消費者權益重好啦。