煲呔剋星45條關注組要組黨，正中白鴿黨馬丁下懷，佢係其中一個鼓吹班大狀要組黨嘅大仙。
大狀組黨，最有興趣係邊個做黨魁同黨鞭呢？八方問咗一吓，個個都話「民主女神」余若薇係黨魁首選，因為論資歷，佢比湯大狀深；吳靄儀點都係由功能組別出線，雖然做議員較長時間，但係認受性難同直選比較。Margaret吳做黨鞭至啱，皆因去到邊度，佢都會睇住湯狀，唔畀佢亂講嘢。
當然湯狀都係黨主席嘅人選，但係Ronny為人率直，想做就去做，Audrey就相對冷靜；至於傑哥，畀人印象重係古板咗啲，做黨魁會太嚴肅。
最後配搭，由余大狀當新黨主席，湯狀同傑哥做副，Margaret做黨鞭。湯狀話過新黨一定會有民主同自由，八方覺得「團結」兩個字都好重要，今次贏政府就盡顯團結就是力量。
講咗咁多，先聽到大狀黨想搞集體領導，即係邊個做黨魁都一樣喎。
傳真︰2623-9278
電郵︰[email protected]