林憶蓮同李宗盛六年嘅婚姻結束後，舊年復出樂壇，推出《本色》大碟，大受歡迎，同陳輝虹又舊情復熾，感情同事業都有着落。
憶蓮今時今日已經唔使同啲後生歌手喺頒獎禮爭崩頭，所以佢選擇喺聖誕同除夕呢啲重要日子，同男朋友陳輝虹出外度假，同行重有憶蓮同前夫李宗盛所生嘅女李喜兒。
身形明顯發福
前日元旦晚上九點幾，林憶蓮「一家三口」出現喺赤鱲角機場嘅抵港大堂，啱啱歡度佳節返港嘅憶蓮，戴上烏蠅墨鏡同冷帽，未知係咪因喺外地度假心情放鬆關係，大吃大喝引致心廣體胖，身形明顯發福，佢推住行李出嚟嗰陣，個女喜兒就好調皮咁企喺行李車度，而陳輝虹就手推另一架行李車，睇佢哋行李車上嘅日本購物袋顯示，佢哋應該係喺日本北海道返嚟。
當記者上前問憶蓮喺邊度返港？陳輝虹就急忙護駕話：「唔該晒，影夠喇，新年快樂！」之後佢哋即往停車場方向離開。
