踏入2006年第1日同讀者見面，小初謹祝大家同埋自己今年逢買必中。
新年流流，經紀黃就話有兩隻股份可以睇長線小小。其中一隻係中化香港（297），另外一隻海爾電器（1169），兩隻股份都有相似的地方，分別係由大陸的大型企業買殼變身而來，背景有番咁上下，但股價同樣都響舊年一直受壓，不過浮沉咗咁耐，相信要沽貨嘅都沽得七七八八，假若稍後有任何注資概念出現的話，隨時又係炒作的時機。
中化香港早前公布獲母公司注入化肥業務以來首份業績，截至今年9月底止9個月，盈利有5.87億元，增幅有50%，而管理層更話，未來派息比率會在15%至25%左右，事件擺明公司已經變身完成，有待進一步推介，以等待芬佬埋位。
至於海爾電器，早排因為中建電訊（138）將所持權益賣咗畀德意志銀行後，股價已經一度異動，雖然中建呢手貨的不明朗因素終於掃除，但海爾電器的前景，最終仍要視乎大股東要點樣湊大佢。
慕容小初