眾歌星前晚悉心打扮亮相叱咤樂壇流行榜頒獎典禮，陳奕迅連掃六獎成大贏家，在時裝設計師鄧達智眼中，他亦是當晚最佳衣着人選，人、衫、歌聲合一，殺晒！其次薛凱琪的甜美古典造型以及容祖兒的多變小天后形象亦切合她們的氣質，分別獲選為最佳衣着第二、三名。至於最不敢恭維的，鄧達智首選Twins，他指二人衣着亂過亂世佳人，尤其她們拖着恐龍似的紗布尾巴。另外何韻詩和楊千嬅的衣着，鄧達智認為前者過了龍、後者則似沒出力。
最差衣着No.1
Twins 深水埗款式
第一眼睇到佢哋，我嘅感覺係「死啦、算啦，上台啦。」整個造型好急就章咁，好是但同立立亂，最差係佢哋拖住條恐龍尾巴，塊布好似喺深水埗買嘅款式，如果係dancer我會原諒佢，加埋衫褲珠鏈直頭亂過亂世佳人。
No.2
何韻詩 最忌扮阿梅
套衫本來唔算差，但係衰在阿詩近期嘅裝扮都tryingtoohard，好想走阿梅以前嘅影子，但阿梅嘅形格你唔係話跟就跟到，着喺阿詩身上有力不從心嘅感覺，其實佢條件唔差，點解唔走一條屬於自己嘅風格路線？
No.3
楊千嬅 十年如一日
千嬅嘅打扮好似冇花心機咁，最首要改善嘅係無論佢波鞋牛仔褲抑或前晚條黑色寡婦裙，佢個髮型都係十年如一日，浪費咗條裙，令佢整個look唔多起眼，冇特別。
最佳衣着No.1
陳奕迅 人歌衫合一
陳奕迅（Eason）歌掂，喺叱咤嘅整個look亦好掂，好有贏家風範。佢嘅造型係玩前衞中有反差嘅路線，呢條路如果都出事就會好弊，但就正好啱佢，冇嘢之中有啲嘢，冇人再會計較佢肥唔肥、靚唔靚仔，全黑衫褲加一頂金色帽，完全唔算dressdown，同叱咤舞台以及佢嘅形象都好配合。
No.2
薛凱琪 簡單古典美
薛凱琪（Fiona）一出道嘅歌、衫包裝都明顯經過思考，當晚佢嘅衣着冇多冇少，清新古典look，好啱佢人靚歌甜嘅洋化女孩形象，亦印證到呢個年代踩上台唔一定要好heavy好多枝節，簡單、隆重又fashionable都得。
No.3
容祖兒 百變小天后
祖兒好努力走百變小天后路線，亦證明佢成功咗。佢一身衣着就完全justright，髮型、紅珠鏈同紅手套襯晒佢小天后嘅身份，亦唔老氣，重有啲阿梅以前嘅味道。唯一係呢種造型以前喺鄭秀文身上見過，唔夠original啫。
採訪：梁錦貞
攝影：林德雄
仇志德、陳偉權
