香港過去一年經濟冇乜大進展，迪士尼又冇效應、自由行又飽和、經濟重有深層矛盾，情況真係幾唔樂觀。但隔岸台灣佬就唔係咁睇，重捧到香港好掂，台灣嘅《天下》財經雜誌，最近嗰期嘅封面古仔叫做「香港再起」，訪問咗馮國經同鄭海泉講講香港嘅優勢。
本雜誌就好捧馮國經，雜誌個網站重叫馮國經做香港「地下特首」，又話香港的士司機都想佢做特首。地下特首呢個名詞都幾搞笑，講到馮國經好似幕後話事人咁厲害，唔知煲呔會唔會唔高興？
不過本雜誌讚得最多嘅就係港交所，話佢哋好積極去台灣拉生意，𠵱家好多台商都排住隊嚟香港上市，令香港股市越做越旺。《天下》喺台灣都幾有江湖地位，難得台灣佬對香港咁友善，八方希望煲呔早啲放咗世貿示威嘅台灣人同韓國人，緩和吓大家嘅關係啦。
傳真︰2623-9278
電郵︰[email protected]