新的一年，有新的希望，無論股市係牛皮，抑或大上大落，總之，年年都有明星股，就祝大家今年慧眼識英雄，吼中兩三隻升幅以倍計嘅明日之星，賺到盤滿缽滿。
其實，去年下半年，港股雖然只係在千多點的窄幅內上落，但好多股票都有比大市為強勢嘅表現，升幅可觀，內地地產股就係其中一個較突出嘅類別。例如，中國海外（688）由年中的1.50元升到上年底的3.50元，升幅133%；華潤置地（1109）由1.20元升到3.275元，升幅173%；重有合生創展（754），由4元起步，到11月已升到11.50元，升幅187%。
私有化潮流亦帶挈唔少人搵大錢，北京燕化揸家已「骨水」，家吓吉林化工（368）、鎮海煉化（1128）同恒基發展（097）等食胡。
重有，濠賭股轉靜後又有內地彩票概念股接力，最勁係華彩控股（8161，前稱金屬電子交易所），去年下半年由0.60元升到上3元，升幅400%，但以去年全年計，華彩嘅升幅高達100倍，係去年股壇嘅神話。
今年揀股，初步仍要向紅籌同國企埋手，私有化的必然對象，儀征化纖（1033）同中石化冠德（934），幾乎係「送錢畀你使」，睇下賺多賺少而已。至於有芬佬「睇場」嘅基金股，亦可以看高一線，例如升勢有餘未盡嘅內地地產股，以及未來幾年接單接到滿瀉嘅電力設備股，都可作為投資對象，今年應會有理想收穫。
盈利可持續高增長
哈爾濱動力（1133）做完「披成」，上月20號之後貨源出街，「係咁而」震一震倉，之後又再上過。「披成」嘅貨，幾乎俾基金同國內人士要晒，好多人攞唔到，家吓股價在9月初5.20元的高位整固，睇勢就快完成，若確認破位而上，量度上升目標直指7.05元。
哈動接單已接到08年，早幾年接落嘅低毛利定單已大致完成，高毛利定單開始提供貢獻，加上鋼鐵價格由高位回落，今年上半年盈利已大升4倍，未來幾年，高增長仍會持續。
郭兆誠