利世民攻打四方城多年，經驗話我知，手牌起手靚唔靚唔緊要，最緊要係打落去要入章。有人一見起手筒索萬子樣樣三四隻，即刻無晒心機，咁嘅心態加上一副先天不足嘅牌，想唔輸都唔得啦！積極進取者，就見一章打一章，其實13隻牌裏面，摸入四、五張，即刻唔同睇法。運氣再差嘅，死守唔出銃，等摸和洗牌再嚟，呢啲先至係正確人生態度，長打長有。
元旦日，有班社工為兒童權益出聲。有個小朋友話︰「唔想再做童工」，呢啲個案確實係「公關催淚彈」。不過同情還同情，利世民所擔心嘅唔係呢啲小朋友有無得去學校旅行，或者有無錢去上課外活動，老實講呢啲嘢對小朋友未來有幾大幫助我唔識評價，但係如果班小朋友自細已經認定自己係窮人，咁佢哋就真係好難脫貧。
幾十年前，每個香港人都識講︰「工字不出頭」，賣鹹魚花生都算老闆仔。到七八十年代，啲家長就會叫仔女︰「做專業人士啦，做生意呢家嘢唔到我哋諗。」結果，做專業人士就變成香港中產嘅理想。到咗今時今日，小朋友耳濡目染嘅，又係一套點樣嘅價值觀呢？
如果自細就俾人灌輸一套「你鬥唔過大商家」嘅思想，小朋友又點會有興趣去了解市場運作？當然唔係每一個小朋友都要立志成為老闆，但係𠵱家嘅問題係好少好少人會諗自己有朝一日會做生意。《國際創業監察》調查發現，香港人創業動機全世界最低，好明顯香港已經無昔日嗰一份衝勁。
畀機會佢哋做香港BillGates
現實係專業人士之路亦都愈來愈窄。做專業人士學講人脈，新移民家庭嘅小朋友又點夠香港中產家庭爭出位呢？佢哋無助可以理解。但係如果班小朋友自細已經抗拒了解市場運作，連最後一條路都斷埋，咁嘅局面又係唔係社會各界想見到嘅結果？
香港去到80年代，都重有白手興家呢支歌仔可以唱吓，究竟係乜嘢原因令到啲人唔再有心創業。創業最緊要係心態，30年前BillGates決定唔讀大學走去創業，佢第一個大客就係當時雄霸電腦業嘅IBM，今時今日邊個先係電腦業巨子唔使我多講。創業唔成功，唔好同我講話大企業壟斷！
利世民衷心呼籲，2006年我哋唔好再教小朋友恐懼市場，等佢哋都有機會成為香港BillGates，好嗎？
利世民