老董在位時，大家都笑佢做嘢慢三拍，特別係人事任命，永遠到晒期都冇下文，煲呔學人搞強政勵治，呢方面改善好多，但係填補空缺就同老董一樣慢吞吞，睇嚟特區政府真係人才不足，十個茶杯九個蓋，永遠唔夠人用。
好似駐京辦，八方聽聞本來有位仁兄表示有興趣，但係要等到○六年先至可以成行，因為要等啲小朋友搞掂升學先至放心北上，點知話口未完，特區準備將主任位降為D6級，咁就唔使諗啦，因為唔係好多人有林鄭月娥嘅犧牲精神，自願降兩級調去英國都肯制，當然林太要陪仔讀書，唔可以比較。
𠵱家煲呔有好多個位要填，駐京一個，民政常秘一個，特首辦主任一個，咁如果鬍鬚仔做咗特首辦主任，就要搵人頂佢個位，如果由平哥頂，邊個頂平哥？
所謂牽一髮動全身，大家且放長雙眼睇，最後梗係煲呔馬房做大贏家。
傳真︰2623-9278
電郵︰[email protected]