沈溢華呢個名係咪有啲陌生？佢就係最近成功上市嘅領匯嘅資產管理總監，在領匯高級行政人員中排名第一，管晒百幾個屋邨商場同停車場。
沈溢華本身係工程師，後來去咗哈佛商學院讀管理，即係武又得文又得。未加入領匯之前，佢同蘇慶和行政總裁一樣幫新地打工，主管威信，大家都泊過威信啲停車場啩，佢以前就係威信董事總經理。另外又做到九巴董事、駕駛學院董事，一句講晒，講交通運輸停車場，無乜人權威得過沈總監。
點解無端端提起佢？皆因噚日民建聯組織咗個汽車慢駛請願活動，抗議領匯啲停車場收得貴；又有人話沙田區佢哋啲停車場空置率高達四成云云。係班門弄斧定明剃眼眉呢？
一間股東完全係公眾嘅上市公司，佢提供嘅服務收乜嘢價，應該由邊個決定？華華真係唔識答，只係知沙田新城市廣場（又係新地嘅）停車場收得重貴，但大家都爭住泊，未聽過有人抗議。