到陸羽飲茶，聽山水畫收藏家醫生C講投資，引人入勝，醫生C並非股票債券專家，只係有涉獵啫，但佢得風氣之先，二十年前就學習睇山水畫，買名畫家真蹟，只買不賣，珍而重之，擺入書房。如是者收收埋埋，曹仁超一月一金幣，知道自己有幾多金幣，醫生C就連自己買咗幾多張畫都唔清楚。總之以前啲畫唔值錢，醫生C只買咗一層樓自住，別無嗜好，確係有條件不斷入貨也。
現在內地富翁湧現，好附庸風雅，中國名畫家身價暴漲，恨到蘇富比、佳士得兩間拍賣行流口水。醫生C話：「內地起碼有一百間拍賣行，一年拍賣好多次，不時有千零件貨湧入市場，古董字畫拍賣興旺到不得了，已到咗我心目中嘅收成期。」佢大約十年前買咗一啲程十髮嘅畫，平均價每幅五千大元，最近試吓市場，送咗兩幅去上海拍賣，前日收到藝術代理電話：「恭喜，恭喜，呢次真係聖誕快樂，你兩幅畫，一幅賣咗十二萬五千，一幅竟然去到二十五萬元人民幣！」聽到呢個消息，我哋都一齊恭喜醫生C，佢亦識做，爭住找數，我哋問佢：「重收埋幾多幅程十髮呀？」賓架陳搶答：「不如問佢收埋幾多幅張大千先喇？」醫生C笑而不言。
賓架陳醒起一位死黨老友有幅林風眠，問醫生C：「市值幾多呢吓？」醫生C話：「林風眠呢年幾嚟比較靜喎，因為先前有人借展覽會為名，宣傳一番，展覽之後唔夠一年，就推出市場，引起市場人士不滿，不如你叫老友有多啲耐性，等市場消化咗先啦。」醫生C睇嚟以後都唔再使睇症咯，久唔久就喺書房搵兩三幅山水畫出嚟賣，已經印印腳。十年前投資五千蚊，今年可以收番幾多？以年息八厘計，就可以收番一萬，但幅畫可以由五千變二十五萬，增值五十倍，真係發夢都估唔到。
中國人只有一部份先富起來，已經產生咁大效果，到咗一半人富起來嘅話，中國古董古畫豈非價值連城，隨時億億聲先買到一件？