人稱肥陳嘅漁護署前署長陳鎮源今日去何文田返新工，接替梁展文出任房屋及規劃地政局常秘，八方梗係要恭喜佢，因為佢真係守得雲開見月明，由D6上D8位，算係升到頂級。
肥陳就笑話，做AO預咗隨時候命，調去邊個位都一樣咁做，當年佢被老董調派去漁護署，大家都笑佢可以印印腳啦，點知人算不如天算，淨係俾隻反斗小鱷貝貝已經搞到頭都大埋。
一提到貝貝，肥陳好雀躍，佢話貝貝𠵱家好生猛活潑，大條咗，信心亦大咗，嘉道理農場嘅人員同佢清潔，佢會發惡追人。貝貝三月會搬去濕地公園，肥陳雖然唔捨得，都要留番畀下手孔郭惠清幫貝貝搬家。
肥陳今次係接梁展文個燙手山芋，好彩好多嘢同佢個位冇關，因為係CM做屋宇署時出嘅問題；至於同孫公合作，梗冇問題啦。
肥陳叫大家畀啲時間佢熟習新環境，先至講吓究竟房委會唔派錢畀啲住客，會有乜嘢益大家喎。
傳真︰2623-9278
電郵︰[email protected]