煲呔由福建返港，經此一役，佢終於認清邊個係真正朋友，當然以佢老哥咁世界，佢必定唔會咁蠢同泛民劃清界線，唔瞅唔睬，但係如果要佢當冇事發生，就恐怕好難，所謂出師不利，阿爺肯定對佢打咗折扣，點會冇影響？
八方都聽過左派人士私底下話信錯煲呔，以為佢好掂，有個別中方人士重以為佢同肥龍聯埋民主派扯貓尾，一定會過，原來嚟真嘅。咁李國麟話，佢真係提出過條件作轉軚交換，但係煲呔最後做唔到，冇即時取消委任制，只好拉倒。
聽佢咁講，就知道煲呔同肥龍真係唔知搞乜，叫人轉軚又冇料到，即係冇誠意啦，你船頭驚鬼船尾驚賊，順得哥情失嫂意，否決係必然嘅事。
事到如今，怪邊個都冇意思，煲呔之友大班都唔肯再多講，就知道幾複雜，有理說不清。
傳真︰2623-9278
電郵︰[email protected]