中韓菲混血兒的衛蘭（Janice）外表成個竹昇妹咁，估唔到口味原來好傳統，問佢最鍾意食乜，Janice二話不說就答：「最Like中國『嬲』麵，哈哈，係撈麵先真，哈哈……」成個訪問過程，Janice都全程嘴唔停，掛住笑，人靚笑都笑得甜過人，兼掛住食：「雪雪……啲粉皮真係好好食呀……雪雪。」笑聲與粉皮索入口時的雪雪聲，充斥以下推介3間中環麵舖，佢重話：「入舖食嘢，唔使咁顧儀態吖嘛。」
記者：盧家蕙、鄺天樂、陳慧茵
攝影：何家亮、陳偉強
Makeup：江中平@A&VMake-upSchool
Hair：TavinLiu@HairCulture
上海菜肉大雲吞$26
自家搓成的雲吞皮比一般港式皮厚身，咬開肉汁爆出，完全正宗上海風味，肉餡比白菜少但依然吃出鮮味肉汁，食肉獸可能嫌無癮，但啱晒追求健康又想飽肚的女生。
餃子園 秘製神仙汁
餃子園由北方人金師傅坐鎮，金師傅曾於雪國及滬江大飯店擔任總廚，經驗豐富，手底下道道菜餚皆滲出濃濃原汁北方風味。問Janice點解鍾意粉麵類，佢笑咪咪咁話：「可能因為中式粉麵無論味道同啲匙羹碗筷，都畀到我好中國風味嘅感覺喇，所以特別鍾意食中式粉麵，哈哈……我最鍾意食水餃同呀雲吞，唔會太啖啖肉吖嘛，咬落特別開胃醒神。」Janice亦推介餃子園的冷盤，冷盤做得出色，自家秘製的神仙汁絕對功不可沒，問師傅用甚麼來調校神仙汁，佢話：「主要用生抽、老抽同我哋嘅北方廚房四君子。」北方四君子即葱、蒜、紅椒同芫荽，難怪香味四溢。
春卷$18（左上）、手撕雞$20（右上）、京式熏素鵝$20（右下）、五香驢肉$20
春卷以迫爆的津白、肉絲、冬菇絲作餡，外層炸得香脆可口，皮不厚卻惹味；手撕雞用比較嫩滑的雞腿肉炸完再蒸，再淋上神仙汁即成；素鵝色澤金黃，內有甘笋、芹菜、木耳等餡料，咬開鬆脆腐皮香味久久不去；驢肉則由中國北方直接運來，灑上神仙汁，想不到嚼勁比滷牛肉還爽口，值得一試。
雞絲粉皮$23
金師傅話：「𠵱家啲雞絲粉皮用綠豆粉整嘅，我就用番傳統北方製法，用薯仔粉整，食落更爽滑煙韌，拉力都會強啲。」晶瑩剔透的粉皮確實充滿彈性，蘸上酸辣神仙汁感覺清涼又醒神，配合鮮嫩的雞絲一起吃，更是咬勁十足。
食客有Say
餃子園（25259018）
地址：中環威靈街69號地下
營業時間：8:30am-11:00pm
座位：40個
羅富記 必試蝦子麵
藝人做每件事都要格外留神，事關四圍都有狗仔隊，真係行步路都要有儀態過人，所以就算點為食都唔可以周圍亂咁食，Janice話：「我都鍾意食街邊魚蛋、串燒呢類邊嘢㗎，最好就可以俾我掃街狂食。」通街食嘢就要顧儀態啫，入羅富記食粥食麵食到雪雪聲都無人話你喇。
鮮蝦球蝦子撈麵$22
鮮蝦球足足有成6粒，算係唔話得，蝦肉很爽口，灑上蝦子後令鮮香味更為突出，味道濃一點會更好。
豬膶牛肉粥$22
粥底尚算稠身，牛肉粥本身夠味，豬膶夠香咬落唔會硬邦邦。
小欖炸魚球6粒$18
鯪魚球乒乓波咁大粒，Janice話：「要趁熱食，凍咗皺皮縮水味道差好遠。」
羅富記（28506756）
地址：中環擺花街50號地下
營業時間：8:00am-8:00pm
座位：50個
麥奀記 雲吞不含豬肉
麥奀記雲吞出名係人都知，位於永吉街的店舖由麥奀記雲吞世家的後代麥志忠創立，香港溫哥華都有店舖。一向為食嘅衛蘭自然唔會放過咁有中國特色的雲吞麵，好彩呢度的雲吞完全不含豬肉，餡料係爽口鮮蝦，Janice話：「靜雞雞偷食咗都唔怕肥面喇。」
鮮蝦雲吞麵小碗$21
完全不含豬肉，配大地魚、蝦子及火腿骨熬成的湯底及全蛋麵，日賣500碗，係全店鎮店之寶嚟㗎。
柱侯牛腩牛筋麵小碗$23
選用牛坑腩及新鮮牛筋再以柱候醬、八角、香草的秘製醬燜製而成，牛腩既爽且腍，非常入味，
麥奀記（25416388）
地址：中環永吉街37號地下
營業時間：10:30am-8:00pm
座位：40個
