由街機移植過家用機嘅遊戲玩得多，倒轉頭由家用機帶起熱潮，再出番街機版就相當少見，最近任天堂嘅招牌大作《MarioKart》繼推出NDS版後，再同Namco合作，推出街機版《MarioKartArcadeGP》，新作包括兩大公司台柱角色，總數多達11人之多，過百款不同道具，加埋可將玩家臉孔拍下來做大頭照，對戰玩份外肉緊！
記者：許福合
攝影：楊錦文
ImageGirl：Winnie
《MarioKart》一向係任天堂嘅重頭大作，今次要出街機版，亦都搵番老朋友Namco幫手，兩大公司其實早有合作經驗，互相將旗下角色於對方遊戲內登場，今集Namco就派出Pacman參賽，既不會影響遊戲風格，亦可令角色更多選擇，個個生動趣怪，難怪吸引到唔少女Fans捧場！
家用玩法搬上街機
街機版保留咗家用機嘅精髓，重點要快之餘，重要精明選擇角色，玩慣家用版都會知道，唔同角色會有唔同特性，好似Mario為例，樣樣都咁平均，適合新手使用，而想反應快加速好就可選公主，而想揸得安安定定，速度又高就可選Wario。街機版當然會配番軚盤、油門同腳掣，留意軚盤有搶軚效果，撞邊或撞車都會略有失控嘅情況，不過相對轉彎時要甩住過就比較容易，只要放鬆油門，輕輕按Brake，就可以片住入彎，練熟好易搶位。另外當起步時，先踏一半油門，起步時再全放，跑車就發出火箭一馬當先，不過搶到頭位同時，又會成為其他人打擊目標，用唔用就睇個人習慣。
怪樣寸爆對手
今次Namco有份製作，重出埋私伙嘅電玩攝影系統Namcam2，屏幕上方設有鏡頭，可將玩家臉孔拍下，重可佩戴各種趣怪配件，如帽、假髮、眼鏡、假鼻等等，數量超過100種，賽車時就可於左下角見番個「靚」樣，當被人用道具整蠱或被人超車，都會有唔同表情！同家用版一樣，經過問號就可以拎到整蠱道具，款式重有成過百種之多，由於數量太多，有時都唔知係點用，最易明白都係向前方攻擊道具，因為會出現LockOn圖示，當變成紅色，就即係瞄準成功，一定打得中，其他道具10個有5、6個都要估估吓。
買卡儲道具
《MarioKart》好玩處係同朋友對戰，NDS版大玩無線，而機街版就玩卡片儲道具，遊戲最多支援4人同場對戰，每局$5，可以選擇是否購買IC卡，每張$8，雖然遊戲毋須規定必用，不過有卡就會過癮好多，可以將單人戰時所打到的道具儲存下來，與人對戰時就可以挑選道具使用！另外，隱藏版圖亦要靠IC卡儲存進度，日後先可以再玩番，同時亦會將成績印於卡面，一睇就分到高下。IC卡有好多款式，其中有張AMShow限量版，最有紀念價值，更係Fans心水之選。
索女車手話好玩
Winnie 鍾意擲人
本身唔多打機，玩落都覺得好玩，公仔可愛，而且唔使技術好高，最好玩係可以拎嘢擲人。
Nicla Mario得意
覺得好難玩，入彎時好滑。畫面就覺得好靚，尤其Mario好得意，另外道具好多款式。
Kiko 比NDS版真實
甩尾入彎夠晒刺激，公仔又搞笑得意，之前玩過NDS版，覺得真實好多。
金沙遊戲機中心
地址：觀塘觀塘道410號地庫01室
電話：31682530