太近賭場強忍賭癮
干曙光 入行十八年廚師
「嚟到澳門打工，夜晚十一點收工，返到宿舍，到兩、三點都瞓唔着。自己喺香港都有賭錢，宿舍對正財神賭場，成日心思思想落去玩番兩鋪。不過老闆話明，千祈唔好賭錢，如果唔係就要返香港，連份工都會冇埋。自己曾經試過飲酒，飲到醉醺醺就唔會去賭錢。點知飲到胃出血。𠵱家總算控制住條賭癮，暫時一次都未入過賭場。只有打多啲電話返屋企，同老婆仔女傾偈解悶。」
文化不同需慢慢摸索
王詠龍 曾任法國駐港總領事館助理商務官
「嚟到澳門同朋友合資做生意，先感受到港澳雖然係一水之隔，但係社會文化差異就好大。澳門唔單只保存好多古迹，做嘢嘅速度都幾滋油，同香港好唔同。咪以為喺香港成功，諗住嚟澳門發展就一定成功，事前一定要有心理準備，需要一段時間慢慢摸索。澳門雖然地方細，好有八十年代味道嘅澳門中區，就同香港中環好唔同，生活節奏冇咁緊張。地方細行到邊都好易撞到熟人，人情味濃厚。」
跟澳門人到珠海消費
楊天明 澳門詠藜園董事
「嚟到澳門先知道，澳門好似遍地黃金，但係當地人唔似香港人咁鍾意出街食飯，生意主要靠嚟玩嘅香港人同內地客。自己經常會親自做買辦，確保啲貨真材實料；試過好幾次，有做水貨客嘅阿嬸，話每日可以去珠海，同佢買啲平價貨，自己當然唔想做壞個招牌，始終唔會入不明來歷嘅水貨。不過自己就感染咗澳門人去珠海消費嘅習慣，工餘到珠海揼骨揼上癮。」
