滕麗名中學時用暑期工賺來的錢買了頭約瑟爹利狗女BB，轉眼愛犬已十四歲。去年初BB的腹部長了一個瘤，需要動手術，獸醫為BB驗血時，發現其身體狀態竟可媲美八歲的小狗，令滕麗名雀躍不已，她盼望BB能長命百歲。
滕麗名家中養了兩頭小狗，分別是約瑟爹利狗女BB和史納莎阿仔，日前她帶了BB到大埔仔拍照兼選購狗仔衫。
由於天氣轉冷，在家歎慣暖氣的BB影相時竟然諸多扭計，還要主人抱抱，在滕麗名多番又𠱁又跪下，BB終於做出單腳企和跟主人擊掌的動作。
滕麗名表示BB已經十四歲，屬於老狗，她說：「我未入行就開始養BB，嗰時我重係讀緊中學，因為做暑期工賺咗錢，我就用四千蚊幫襯朋友間寵物店買佢返嚟。」
戒吃肥膩食物
滕麗名最初飼養BB時，為了𠱁牠開心，甚麼食物都給牠吃，但隨着愛犬年紀漸大，滕麗名開始不准牠吃太肥膩的食物。
去年BB的腹部長了個瘤，滕麗名即送牠到獸醫處動手術，她說：「獸醫同我講割咗安全啲，其實瘤就係佢體內嘅分泌物。獸醫同BB抽血驗身時，竟然話BB嘅健康狀況好似八歲狗仔一樣，咁即係話佢返老還童啦，其實我都擔心有一日BB會老死，但𠵱家聽到獸醫話佢好強壯，我梗係最開心，重希望BB可以長命百歲㖭！」
兩犬相處融洽
問滕麗名兩頭愛犬相處融洽嗎？她說：「佢哋兩隻狗好friend㗎，尤其阿仔雖然細個啲，但佢好錫BB，好似今日我冇帶阿仔出街，佢見到BB去街時，顯得好唔捨得，阿仔會一直守住門口等BB返屋企。」
採訪：比華利 攝影：林德雄
