到上海總會食飯，碰到退休賓架Ｎ，賓架Ｎ十幾年來鍾意收藏鐘表，久唔久就搵一啲「專家」同佢交換心得，互相鑑賞對方收藏，據賓架Ｎ講：「一啲專家不外如是，寫就天下無敵，佢哋自己啲藏品係普通料啫。」賓架Ｎ自細有家底，讀大學時已被公認為有錢仔，收收埋埋啲古表名表，幾值錢㗎。
講表唔係左丁山嗰行，自己戴一隻精工表戴到爛為止，現在索性以手機當作計時器。細路時聽老竇日講夜講「江詩丹頓」，以冇錢買一隻為憾。老竇過身之後，自己儲咗一啲錢，忍痛買咗一隻「江詩丹頓」，「家祭毋忘告乃翁」，至今仍然唔捨得戴，原裝收埋，睇怕都已經折舊貶值咗咯。
既然唔講表，講馬啦，賓架Ｎ立即眉飛色舞，講六十年代佢讀大學時到馬場做兼職售票員嘅故事。賓架Ｎ話：「大學三年班，得一位馬主寫信推介，我到馬場遴選會員廂座做賣飛，人工就唔多，但冇VIP介紹，一定冇得做。遴選會員廂座有好多商界大人物賭馬，下注極豪爽，一位爵士下注心水獨贏，夠膽落注三萬大元。我哋啲同學畢業後，月薪都冇一千，我見到人哋下注三萬，幾乎口窒手軟，唔識得打飛。爵士又夠豪爽喎，贏咗收錢，淨係要五百蚊紙，剩番啲紅底及濕柴，畀晒我做貼士。六十年代中，未有ICAC，人人都係咁收，嗰個月我在馬場兼職，貼士收入凡四千大元，一年大學學費都只係八百蚊咋！」
六十年代中，三萬蚊可以買一層樓，記得老竇講過五十年代馬場有兩個大豪客，一個姓李，一個姓孫，每次入場帶一個鞋盒，裏面鋪滿五百蚊紙，輸錢面不改容，輸極都有，贏咗錢派貼士，簡直濕濕碎。業餘賽馬時代嘅故事，今日聽之，似天方夜譚，但聽完，比較吓今日嘅制度，就知道香港喺過往五十年間，進步極大。做事不能抱殘守缺嘅。抱住老皇曆做人，得閒講句「一枝紅杏出牆來」單單打打，一出聲就自暴其短啦。