自從推銷政改方案，煲呔嘅民望呢個月一路下瀉，最近重跌到上任後新低，佢嘅運氣認真麻麻，相反特區第三把交椅唐唐就鴻運當頭，噚日係○六年首個賽馬日，唐唐兩匹愛駒「心福」同「富士晨曦」就贏晒，喺○六年先拔頭籌。
一日拉四次頭馬
唐唐叫晒親朋戚友嚟拉頭馬，開心一番，攞番個好意頭，就連肥龍都有應唐唐邀請，同佢一齊拉頭馬。佢咁旺，帶旺埋老友許世勳名下嘅「燦惑」同立法會秘書長馮載祥名下嘅「哈哈霸」都相繼贏馬，唐唐就同佢哋一齊拉頭馬，一日夾埋拉咗四次頭馬，又可以乘機修補吓同立法會關係，難怪佢好開心咁話成班老友喺廂房飲香檳慶祝，飲到醉醉哋。
唐唐同八方講，元旦係好日，有馬贏自然開心，佢嘅新年願望就係希望香港經濟好，各階層人士都受惠，馬迷贏錢。佢重同八方介紹兩匹頭馬，「心福」係佢響澳洲親自揀番嚟，因為鍾意隻馬血統好，將來應該有一番成就，練馬師霍利時就練馬功夫好，「心福」喺第五仗就開齋，霍利時功勞唔小。
唐唐話，佢同練馬師研究過，呢隻馬成熟後，長力可扳至二千米，但現階段唔會太早催谷隻馬，等隻馬健康自然成長。至於「富士晨曦」，唐唐話隻馬去年元旦跑第二，今年終於贏番補數，而且今季贏咗兩場，呢隻馬同「心福」一樣，認真抵錫。
馮載祥同班皇仁老鬼名下嘅「哈哈霸」跑贏就係爆大冷門，呢隻馬成三十九倍咁高，如果買中就真係發達！但班皇仁老鬼都冇諗過會贏，結果全部冇着西裝，淨係着晒牛仔褲便裝去拉頭馬。
傳真︰2623-9278
電郵︰[email protected]