每年嘅除夕夜，大劉劉鑾雄都會同身邊摯愛去好友搞嘅除夕派對，佢今年先拖住女友呂麗君、女兒劉秀融同埋劉媽媽出現喺彤叔鄭裕彤喺君悅酒店搞嘅除夕派對，倒數完十分鐘，佢哋又坐車轉去好友林建岳喺麗嘉酒店舉行嘅派對，逗留咗半個鐘就走，大劉一個人等車嗰陣，問佢葉璇係唔係同佢老友彤叔上契，佢心情大好話：「唔識答呢啲問題。」重同在場記者講新年快樂。
緋聞無損感情
呂麗君前晚着住套閃令令晚裝，隱約見到腹部微隆，似乎再有喜，如果係嘅話就真係恭喜晒啦。大劉佢哋上車離開嗰陣，喺車度見到呂麗君成個正印咁挨住大劉。上年十月，有雜誌話呂麗君喺倫敦修讀博士學位期間，同一名中東裔及一名華裔嘅男士往來甚密，事後呂麗君即時否認，但相信呢件事絕對冇影響佢哋呢對情人嘅感情。