時光飛逝十六年，香港首富李嘉誠噚日一如往昔，風雨不改喺元旦到柴灣佛教墳場拜祭亡妻莊月明。身邊重有佢嘅大仔澤鉅同大孫女。至於細仔澤楷因為要出埠公幹，八方所知佢日前已先行向亡母拜祭。
噚日朝未夠九點，李超人祖孫三人到柴灣佛教墳場，李老拜祭亡妻時，五、六名保鑣發覺附近有陌生人拍攝，警覺力敏銳，第一時間以身軀遮擋，另有人舉數碼相機向記者反拍。
李嘉誠舉頭問記者：「你哋係《壹週刊》定係《蘋果日報》？」記者答係《蘋果》。佢又話：「知道係你上司叫你嚟做嘢，你哋記者都好好。」最後贈言：「你考慮一下轉行，咁樣做冇意思。」李嘉誠拜完亡妻莊月明，輪到澤鉅兩父女，眾人喺墳場逗留十五分鐘後離開，李嘉誠好禮貌咁向記者揮手拜拜。
傳真︰2623-9278
電郵︰[email protected]