打完一場政改敗仗之後，煲呔趁上京述職，順便放吓假。咁放假去邊呢？原來係去福建武夷山遊山玩水飲大紅袍睇古漢城遺址。武夷山在福建西北，係著名旅遊勝地，有「奇秀甲東南」美譽。古書話地上精靈修成正果後，會雲集武夷山，以待升仙。煲呔咁多地方唔去嚟呢度，應該有啲特別意思。
唔好搞人 早日返歸
但唔知係咪巧合，煲呔似乎非常「掃把星」，衞生部差唔多喺煲呔到埗嘅同時，公布福建有位四十一歲工廠女工，證實染上禽流感而不幸去世，係中國內地第三宗人類禽流死亡案例。
其實煲呔「掃把星」效應以前都出現過好幾次，九一一事件發生時，煲呔就係去咗美國；今年佢再去美國，又有個超級颶風橫掃；而上次佢去四川，一去到人哋就發豬瘟；到今次去福建，竟然又雞瘟死人。到底係巧合定咁邪？真係信不信由你！不過如果八方係福建省省長，就一定唔會封晒路招呼煲呔，總之求其請佢食餐閩越菜就嗱嗱聲送佢走。
既然煲呔不宜出門訪友，咁不如早日返歸；佢剋住人哋，但同香港就幾夾，你睇政改咁大劑，民望都只係跌小小，就知呢個特區幾咁厚愛呢位孤獨推銷員，所以唔好周圍去搞人哋啦，早日返歸搞掂自己啲深層矛盾重好啦。
傳真︰2623-9278
電郵︰[email protected]