香港雖然已脫離英國管治，但英女皇授勳經常有港人上榜，今年元旦授勳名單有三個同香港有關人物，分別為年前嘅平機會「王見秋事件」主角之一余仲賢、冠軍科技集團主席簡文樂同香港青年藝術節創辦人麥蓮茜（LindseyMcAlister）。
現任北愛爾蘭少數族裔委員會行政總監嘅余仲賢獲頒OBE（英帝國官佐勳章），表揚佢為少數族裔爭取權益，余仲賢一眾老友話，今次可以為佢遭平機會終止聘用為行動科總監一事大平反。
獲頒CBE（英帝國司令勳章）嘅簡文樂多年前推出中文傳呼機發達，生意愈做愈大，旗下做無線通訊嘅公司「無敵通」更為英國醫療部門提供緊急通訊設備。
定居香港二十幾年嘅麥蓮茜，九二年創辦青年藝術節，由最初舉行八天，發展成一連三十六日嘅大型活動。麥蓮茜透露新一年希望擴大藝術節規模，改為基金會形式運作，一年三百六十五日搞活動。
傳真︰2623-9278
電郵︰[email protected]