最近做咗新「民主女神」嘅立法會議員譚香文（圖），噚晚上商台節目《無底深談》同主持人傾偈，不過就唔係講政改，而係講吓佢童年同感情生活，譚香文話細路仔時，電視明星譚炳文好紅，好多同學仔見佢哋個名咁似，都問佢係咪譚炳文個妹，佢當時諗係都唔錯，所以冇作澄清！原來佢又好鍾意《奮鬥》呢首歌，因為細個家境唔好，令佢明白要咬緊牙齦奮鬥，先可以出人頭地，最後終於去咗英國讀會計。
至於感情生活，𠵱家重係獨身嘅譚香文話其實佢冇乜拍過拖，但喺英國讀書時，有個鬼仔暗戀佢，可惜佢掛住讀書，唔知人想追佢，又話獨身生活唔錯，相信呢個係上帝對佢嘅安排。其實譚香文擇偶條件好簡單，就係要誠懇同有善心，樣唔重要，佢又不忘大讚立會入面，個個男議員都有魅力，連肥佬黃容根，譚香文都話有咁多選民支持佢，證明黃容根有佢嘅魅力啦！
傳真︰2623-9278
電郵︰[email protected]