開完聖誕Party又除夕倒數，大時大節好似冇乜陪過屋企人，所謂新一年新開始，一於趁元旦日晨早搵定靚位飲茶補數。講到歎茶，梗要搵間老字號酒樓，食埋傳統靚點心，一定𠱁到屋企人甜到入心。
記者：鄺天樂 攝影：陳智良
Model：Natalie、Giffy、TC@Salvodor
有錢上高樓 無錢地下蹲
香港早在1845年已有茶樓開業，多集中在西營盤至威靈頓街一帶。早期有「高樓」及「地廳」之分，高樓均設有二、三樓，收費比只有一層的地廳高。時至今日，新式酒樓、快餐店已紛紛湧現！
40年經典古法 得龍
得龍大飯店開業四十餘年，不論點心、小菜皆以古法懷舊見稱，其他地方已不易吃到，古法風味絕對是坊間點心難以媲美。
欖仁馬拉糕$10
得龍的古法馬拉糕比一般的顏色較深，馬拉糕以豬油搓成，鬆化軟滑，入口啖啖欖仁香。
燒腩卷$10
經典傳統點心之一，大大啖燒豬腩肉，香味四溢，唔怪得我老竇成日話想食燒腩卷啦！女士們可能見到就怕怕，但偶然放肆吓都係人生一大樂事！
古法糯米雞$13
不少酒家都以珍珠雞代替糯米雞，但這隻糯米雞有成隻手掌咁大，餡料有雞肉、鹹蛋黃、鵪鶉蛋、雞肫同臘味㖭！
得龍大飯店（23207020）
地址：新蒲崗康強街25-29號地下
茶市時間：6:00am-5:00pm
茶芥：$4/位
50年傳統點心 鳳城
香港有不少以「鳳城」為名的茶樓、酒家，但五十年歷史的正牌鳳城酒家就只有北角渣華道及旺角彌敦道兩間，幾十年來羅師傅堅持以傳統手法炮製點心，想食真正老點心就咪亂去喇！
合桃叉燒酥$15
最特別之處在於其雙層酥皮，面層香甜甘露酥，底層鬆化千層酥，遠勝一般全豬油酥皮！
鳳城酒家（23815261）
地址：旺角彌敦道749號1-2樓
茶市時間：9:00am-3:00pm
茶芥：$6/位
80年焗盅泡茶 蓮香樓
蓮香樓於1889年在廣州開業，至今已有過百年歷史，香港蓮香樓則在1926年正式開業，踏入第八十個年頭的蓮香樓為本港歷史最悠久的茶樓。所謂水滾茶靚，故蓮香樓仍以大水煲及焗盅泡茶，讓你慢慢嗒到啖靚茶。
豬膶燒賣（前）$14豬肚燒賣$11
豬膶燒賣同豬肚燒賣真係好難有得食。大大件、厚肉富口感的豬膶同豬肚放在豬肉上蒸，膶香肚爽，別有風味。
蓮香樓（25444556）
地址：中環威靈頓街160-164號
茶市時間：6:00am-5:00pm
茶芥：$7/位
