上星期都喺度發出「冇片預知警報」，今個星期3區港版只可用一個「莫」字形容！不過好彩俾小記搶先攞咗隻《謊島叛變》做優先預覽；敏感嘅複製人道德問題，再加槍口相對嘅精采追逐動作場面，都稱得上一句「文」、「武」雙全；須知下星期都可能冇乜3區，就更值得睇！發行公布出貨日期為6號，不過好多碟舖收到嘅到貨日期，係提早咗嘅3號星期二，大家留意喇！
記者、攝影：朱崇德
上星期班香港發行，個個趕聖誕前出碟，搞到今個星期碟場超靜局！不過呢個HolidayMood好似重延續着，因為香港發行嗰邊，到𠵱家都重未公布下周「供貨單」，真大鑊！不過行內人估計，本周美版1區嘅《驚心洞嚇》、《長途嚇機》同《換命快遞2》，下星期可能會出3區，不過資料未經證實，大家都係聽住先啦！另外臨截稿前，記者重見到3區《平井堅十周年紀念LiveDVD》同《中島美嘉BEST》落咗場，$98抵玩價，超熱賣！
複製人變後備零件
生物複製技術早已不再停留在牛、羊等動物身上，成功複製人類指日可待！《謊》的故事背景發生在不久的將來──2019年，美國政府聯同科學技術公司共同製造「複製人」，目的是為一些有錢人「買保險」！預備100%無排斥性的後備器官，並對外訛稱複製人無感情、無感覺，不過事實當然相反啦！複製人過着極權操控的生活，生產者不對他們灌輸知識及壓制他們的思想感情，為的就是要他們「好好地」生活，等待被宰一刻！
電影前半段都係講「複製人」活在極權之下，導演亦特意拍得幾壓抑吓，除咗表現出當權者的無恥外，亦都表現出對極權統治的控訴；有時啲政治家口口聲聲話為你好，最後原來俾人賣咗豬仔都未知道！
鐵板劈車 震撼逼真
故事中段筆鋒一轉，講男、女主角──複製人林肯同佐丹終於識破陰謀並成功逃走，複製公司為怕揭露真相，故買兇僱佣兵對他們進行追殺；這是全劇戲肉部份，追車、槍擊、大廈倒塌，真係差唔多將成個L.A反轉，不過講到最深刻一幕，都係公路汽車追逐戰，一個個火車鐵轆、鐵板，將追兵的汽車一架架轟飛又斬開，真係拍得又逼真又富臨場感，絕對有潛質成為經典追車場面；至於故事結局，複製人能否揭破奸商的暴行？呢度就要賣個關子等大家買碟睇嘞！
Bonus部份都較「削」，只有一個Making，最可睇一樣係追車一幕，真車、鐵轆，真係一塊鐵板將成部車剖開，而且重拍得幾驚心動魄吓，一定要睇！
Profile
片名：謊島叛變
區碼：3區
價錢：$138
發售日期：1月6日
音效：DOLBYDIGITAL5.1
查詢：華納影視（31281791）