精電（710）最近一個月喺5.4元到5.7元水位上落，再回試呢期橫行低位，有得諗。精電主打係液晶顯示屏，呢期祖國3G風盛行，手機股炒到飛起，照理，彩芒股包括精電在內，一樣受惠3G概念。再講，精電除咗TFT及CSTN之外，今年6月亦投資韓國OLED製造商NessDisplay，瓣數齊全。
精電05年度中期受存貨撇帳3760萬銀影響下，純利重微升2%到9806萬銀，全年度穩紮穩打上兩億銀，預期PE維持9倍，並唔貴。又精電一路有派高息紀錄，單係keep住去年度水平，講緊6厘8，加埋集團手頭淨現金4.9億銀，港股呢期橫風橫雨，精電高息兼係現金牛，避風力強。呢期吼住5.4元底，上望250日線6.6元，回報率22%，到時，精電預期PE10倍鬆少少，仍然合情合理。
祥泰行0.33元先嚟一注
祥泰行（199）前個星期公布06年度中期（9月止）業績，成績表見紅，跌穿0.4元橫行支持，有低位，又係值得收集，又講兩點：第一，祥泰行上年發咗10億銀可換股票據，引入城中猛人爆棚哥及何厚鏘，市場一路昅實祥泰行喺馬交業務動向，而最新嘅中期報告披露，祥泰行就收購馬交及祖國若干物業擁有權，分別進一步支付可退還誠意金2.3億銀及1.5億銀，新業務一直有進展。
第二，祥泰行除咗上邊兩位猛人，美資對沖基金OZManagement及StarkInvestments都榜上有名，估計大孖沙揸住嘅可換股票據，等食大茶飯。Beforethat，可換股票據嘅換股價係0.42元及0.44元，現價不過0.355元。呢期港股唔掂檔，祥泰行適宜低吸，見0.33元先嚟一注，博上番票據換股價，都肥仔。
錢雋