由林峯、黃宗澤同陳敏之主演嘅無綫劇集《覆雨翻雲》會喺禮拜四播映，佢哋三個噚日去咗尖沙嘴香格里拉酒店參加首映會，欣賞精華片段。黃宗澤前晚拍劇時扭傷腳，噚日竟然用雨遮當枴杖，拐吓拐吓咁嚟，搞到監製同演員要輪流扶住佢，演員上台列席時只有黃宗澤有櫈坐，升格做咗大佬，難怪黃宗澤喺台上話：「今次重唔係我威晒！」
林峯嫌劍重
雖然黃宗澤扭傷腳，不過手腳依然靈活，重上台同林峯攞起覆雨劍同翻雲刀格劍，證明冇乜大礙，問黃宗澤有冇將傷勢告知緋聞女友胡杏兒，佢話：「點解佢會知呀，唔知呀。」林峯就話：「我一身IT打扮，冇諗過要耍劍，把劍攞五秒都手震，之前拍劇時試過扭傷手腕。」