今日元旦，祝願大家都有一個好開始。FollowMe擇吉今日開Show，逢周日見報，每次推介1至3隻港股，有大嘢有細嘢，有熱嘢有冷嘢。今年要打響頭炮，出擊對象，係中銀香港（2388）與中航興業（1110）。
3個半禮拜後，就係農曆新年。揸住呢對中字頭孖寶，好過出雙糧，分分鐘勁過年初三賀歲馬中孖T。
中銀睇17.30元
中銀香港（下稱中銀）值得睇好，理由多多，揀其勁者，簡析如下：第一、中銀早幾個月搞緊5-10年企業發展策略，計一計，已到瓜熟蒂落之期，一旦出台，大行對其評價勢必加分。第二、中銀大股東中國銀行，計劃在內地大搞保險業務，只待國內監管當局㩒綠燈；如果經由中銀做平台，中銀必有着數；近期內地保險股走勢靚爆鏡，中銀搞埋保險生意，股價應有正面效應。第三、中行準備今年首季上市，中銀表現愈好，對中行集資銀碼愈着數，心理因素對中銀股價有利。第四、荷銀啱啱出咗份報告，對中銀評級由增持調升到買入，目標價提升到17.30元。
中銀近4個月走勢落後，年底假前有追上迹象，彈上15.05元，突破20天保歷加通道中軸位14.69元，一度逼破通道頂部14.984元，大升浪一觸即發，短期先攻陷去年高價16.95元，再挑戰目標價。要加倍收益，可兼買中銀C輪9068。此輪6月尾到期，行使價14.88元，輪價0.495元，溢價3.2%，槓桿率30.1倍。荷銀睇中銀可見17.30元，如果到價，此輪不得了，起碼值2.439元，升幅393%，可以肥到着唔到襪，更加連鞋帶都綁唔到。
中航睇1.94元
中航興業（下稱中航）上周走勢突見冒勇，假前收1.52元，突破由去年8月初引伸下降軌，係時候起飛。
大摩最新報告，話見過中航管理層，得知除油價上升影響航空業之外，Fundamentaloutlook完全冇變，又估中航NAV達2.06元，評級提升至增持，目標價1.75元。
中航除受惠油價今年可能回落外，做飛機餐生意更加好到你唔信，幾壟斷內地飛機餐市場，高層且透露呢瓣業務將成增長支柱。照咁睇，目標價1.75元肯定太保守，去年9月12日高價1.94元仍非阻力所在，浪頂應在8月初高位2.375元，上升量度56%，宜速登機。
高彰坡