縱觀今年嘅吃喝玩樂界別，喜事一單接一單，講玩，新型商場走勢頗凌厲，開完一個又一個，但要數最具TalkingPoint嘅，就梗係apm啦，就連觀塘原居民黃榕都話呢個場係觀塘坊眾一個大救星，意義咁重大，當然係TheBest啦！
記者：黃婉冰
Model：黃榕
攝影：楊錦文
第一位 觀塘不夜蒲場apm
2005年蒲界喜事都唔少，先後有唔少新商場陸續出場，好似apm、Cantonyama、銅鑼坊，但數最惹人注目，最具話題性就梗係非apm莫屬，尤其對觀塘一眾鄉親父老影響深遠，落成後打救咗唔少苦悶嘅觀塘街坊，終於可以唔使出到老尖或者旺角，連卡拉OK都可以開到晨早6點，又多個地方可以Hea天光，喺舊區出現一個咁完善嘅蒲點，淨係呢個Concept都已經夠晒殺啦。
潮人撐場：黃榕
「以前觀塘無咩娛樂，就算戲院都係好殘舊，要玩就要出番去銅鑼灣或者尖沙嘴，apm開咗之後方便好多，啱晒住喺呢頭附近嘅後生仔女，呢度有K唱又有好多Shop，我住得好近，所以平均一個禮拜都會落嚟一、兩次，呢度完全係今年最好嘅新蒲點。」
第二位 迪士尼炒熱OceanPark
等到頸都長，終於等到迪士尼正式開幕，點知淨係試玩就已經係不停嘅投訴，但愈多人鬧就愈多人想去，雖然好多人都係邊鬧邊玩，但個個咪又係一樣玩得咁盡興！迪士尼嘅興建令香港人多個選擇，點都好過無得揀！
有競爭先有進步，多得迪士尼樂園帶挈，令本來沉寂咗一排嘅海洋公園奮發圖強，呢兩年來不停搞新意思新玩意，帶挈玩家，唔使來來去去都係過山車、海盜船咁鬼悶。而且在競爭與比較之下，令到好多人開始懂得欣賞海洋公園嘅內在美。「逼死你」開咗，爆滿竟然係新聞，其實OceanPark就日日都咁多人！
第三位 好景洗底變潮場
家陣行經好景商場已經再聽唔到有人擘大喉嚨嗌「四樓有四仔」，因為由年中開始，此地已經努力洗底，改邪歸正，二樓大變身全層變成蚊型舖仔，潮舖入主，既可以俾年輕人創一番事業，潮友以後又可以多一個「潮」勝地！
潮人撐場：阿華（好景商場二手店老闆）
「細舖好在租平所以好啱後生仔創業，加上如果商場肯做宣傳嘅話，潛力都唔差，加上今年都有幾個場開，細舖創業都係今年一個趨勢。」
第四位 Aqua靚景攞獎
都話食界今年喜事重重，最值得一提嘅係Aqua餐廳榮獲《亞洲時代》雜誌選為全球最佳夜景餐廳之一，攞得呢個獎，梗係要有番咁上Quali嘅，全球只得七間餐廳入選，而Aqua就係香港唯一一間。講真，香港有幾何可以攞呢啲國際性獎項？咁威水，身為香港人都覺得驕傲！
潮人撐場：連阿Rain來港都去，貪佢個無敵海景！
第五位 泰昌蛋撻再戰江湖
對泰昌而言，今年可謂悲喜交集，悲，係無良業主喪加租金，搞到結業；可喜者就係在各界人士力撐之下，舖頭又可以重出江湖再嚟過，新舖重搞Gimmick同連鎖咖啡店BaristaCafeCrossover，新店開張咁耐旺足咁耐，早前重喺旺角新世紀廣場FoodCourt開埋分店，人氣比以前更盛，所以話塞翁失馬！
潮人撐場：當然，依然係肥彭啦！
第六位 Spa大行其道
今年OL話題除咗講買衫化妝之外，就係講Spa。今年Spa場非常興旺，大小Spa場陸續開業，最具代表性嘅首推置地文華酒店，Spa加埋各種各樣嘅特色Treatment同設施，落足本錢，難怪未開張已惹來各界垂青。
潮人撐場：David（Aluminum老闆）
「其實近年開始，一啲中產階級嘅年輕人已經開始注重自己嘅健康同Relaxation，所以，Spa之所以可以大行其道，呢個都係原因之一。」
第七位 南翔饅頭店殺到
年中都有唔少過江龍食店進軍本地飲食界，之不過唔係間間都可以一開就排晒長龍，上年有小肥羊，今年就有上海名店南翔饅頭店，話晒都係上海百年老號，個朵咁響，加上又係第一間進駐本港，唔多唔少都有番咁上下號召力，起碼捧場客以後唔使為食籠小籠包，山長水遠走到去上海咁辛苦。
第八位 數獨狂潮
今年每個早上，陪伴OL食早餐的總是一份《蘋果》遊戲版，女士們邊吃邊填！數獨源於瑞士，發揚光大於日本的拼圖遊戲。數獨衝出日本，要多得在04年把它帶到英國的大法官高樂德！拼圖內有一九宮格，每一格又細分為小九宮格，9個數字，81個格仔，已經瘋魔萬千人，數獨書長出長有，聖誕更有BoardGame同手提機推出。
第九位 齊齊High花茶
花茶本來唔算係咩新鮮事，只係食正今年大講健康、崇尚天然嘅Trend，加上花茶Cafe開完一間又一間，畀三十零蚊，就可以好Elegant，好悠閒咁歎吓茶，感覺High啲，自不然吸引到一班消費力中等又想有好享受嘅客路，順理成章，花茶熱一觸即發，再加埋無記嗰套《心花放》，明星效應同傳媒不停力谷，花茶潮話咁快就廣泛受落。
第十位 快餐店變「新」潮
今年飲食界有以下一個現象──老字號改走YoungLine，就連幾間大型快餐店都不甘示弱，一間接一間改變形象玩變「新」，例如美心MX，裝修摩登咗，食物款式選擇多咗，最好係價錢依舊，只要畀幾十蚊就有餐廳級享受，老、中、青客殺晒。
我的05No.1
