話咁快又到咗2005最後一日，年年呢個時候都會來一個回顧總結。娛圈會講吓邊個藝人緋聞最轟動，新聞界會講講邊單新聞最大單，潮流界當然要講吓潮人潮物，預咗俾你話老套，但唔講容乜易俾人話追唔上時代脈搏，所以本人都唔執輸，摷咗十件今年男潮界好事典，由潮玩PSP到高級玩意跑車逐樣同你回味，好讓各位潮界街坊有話題！
記者：黃婉冰、何兆彬
攝影：何家亮
「我記得幾年前日本試過推出一款揹喺背脊，連埋個LCD芒嘅PS，等啲人可以帶埋出街玩。𠵱家PSP就係實現咗呢個概念。好少香港人會花多啲時間喺屋企打機，但又會花好多時間去等車、等人，PSP可以話係一個好好嘅解悶工具。我自己就鍾意喺拍戲等埋位時用嚟解悶，打到攰又可以聽MP3，一部機搞掂晒，唔使袋咁多機出街，方便好多。」
第1位何時何地都PSP
論05年盛事兼城中熱話，首推PSP（PlayStationPortable）正式登陸香港發售，相信唔會有人反對。呢部被譽為五年來聲勢最浩大嘅遊戲機，之所以可以令一眾機迷愛得如此瘋狂，除咗係佢夠Functional外（播UMD、打機、聽歌、睇片四合一），從今以後，PS迷想在任何地方、任何時候玩Winning的願望成真！幾年前，地鐵上最常見的是人人一份《蘋果日報》。如今，地鐵上後生仔一人一部PSP，當然唔少得，免費附送「打機坐過站遊車河」啦。
潮人撐場
第2位iPodnano型「細」出場
iPodnano一出，剛買iPodShuffle、Mini的即刻變晒儍仔。由10GB變20GB……60GB，iPod即使加埋彩芒睇相、睇片都太順理成章。就係無人估到佢縮到咁細，兼自廢Mini呢條水路（停產）。難忘記，睇住SteveJobs以兩指把他的nano從牛仔褲散紙袋拉出來！
潮人撐場：林海峰推出本地官方第一個Podcast，「聽iPod擺甫士」同一星期做幾本潮流周刊封面。
第3位BlingBling潮閃爆潮界
05年出街特別耀眼，十個有九個潮友都着到珠光寶氣又浮誇，街頭巷尾一個個「億萬少年」。一句講晒，又係Nigo效應，佢自言棚牙太醜，結果連棚牙都鑲埋石！結果益咗專出鑽飾鑽表嘅Jacob&Co.，而上至名牌Dior、VivienneWestwood，平至普通女人街米奇Tee，都推出埋閃晒嘅飾物！
潮人撐場：Luke（B.Sound主腦人）
「BlingBling好多年前喺美國已經勁興，今年香港咁興，原因都係因為Nigo，由佢開始湊N*E*R*D阿PharrellWilliams成日着到周身閃令令，港日潮流都跟佢走，加上Bape都勁玩Bling，香港即刻勁Hit囉！」
第4位首個Walkman手機W800i
年中閒閒哋幾十款新手機登場，但論今年最出位又多人撐嘅手機，十個手機潮友，九個都大力推舉SonyEricsson部W800i，梗係啦，話晒都係全球首部Walkman手機喎，重要整合咗SONY最耍家嘅Walkman技術，就算熄咗部手機，都可以繼續當Walkman咁聽歌，播足30個鐘都無甩拖，淨係呢個SellingPoint就已經夠撐有餘啦。加埋個200萬像素攝影功能，一部「電話×隨身聽」有咁多過人之處，受力捧理所當然啦！
潮人撐場：容祖兒為發布大會撐場，W800i亦贊助番佢演唱會。
第5位adidasSuperstar35歲翻生
今年嘅adidas，你話佢又再掘老祖宗山墳都好，05的確係來勢洶洶（重收購埋Reebok㖭），為慶祝35歲仔生辰而特別推出嘅35對別注版Superstar，聲勢十足，結果明星個個腳踏一對，最後一對TopSecret重玩神秘，有錢都買唔到，玩到咁大，風頭的確蓋過「黎茄」，跟手香港重有首間ConceptStore殺到，難怪即時成為潮界HotTalk！
潮人撐場：Dantlet（HEADCOACH老闆）
「今年Superstar35周年紀念版同ConceptStore一連串咁搞，經過精密安排，特別係嗰35對紀念版，一出街有一半都做到好Hit，籌備唔夠半年搵到6個大牌子Crossover，好成功！彈起有理吖！」
第6位猿人翻生 踩入美國
多得PharrellWilliams同Nigo，自從兩個合作開咗間BillionaireBoysClub同ICECREAM系列，再喺美國、台灣開埋舖，又食正BlingBling潮，搞到個牌子即刻變得國際化。香港，Bape狂潮再臨，一件鯊魚拉鏈衞衣，炒到過萬。
潮人撐場：Stanley（NEVERTHELESS老闆）
「Ape已經入晒屋，主因係肯落本，Detail位同布料都有心機，有噱頭，好似件鯊魚Zip-up就夠突破。」
第7位Uniqlo逼爆尖沙嘴
Uniqlo有「日本Giordano」之稱，反而在香港少聽見此稱號。價錢主要分$99、$199及$299，其實稍貴過日本10~15%。點解擠提咁搶法？都話香港人跟風囉。
潮人撐場：老人家話：「新屎坑、三日香」，專門店開幕頭幾個月，想逼入去都幾難！
第8位Canon350D正機平玩
近一年「Prosumer相機」唔成氣候，直至350D一出，人人扮專業。800萬像素、採用20D的專業級DIGICII處理器，開機快、Save得快，再加上體積細、輕，連女仔都話好好用！
潮人撐場：之達（相機雜誌總編輯）
「800萬像素、包埋鏡頭價錢都唔使一萬蚊，單鏡反光機所有功能佢都有晒，Accessories又比Nikon齊，加上Canon又係大牌子，有質素又抵玩！」
第9位RichardMille平地一聲雷
表壇講歷史，要平地一聲雷，唔易！Richard創牌只有4年，第一年來香港就開專門店。款少易記，由RM1到RM9只有9款，最平27萬，最貴270多萬。當陀飛輪變成中年人的晒碼頭工具時，佢來一招任撞任跌陀飛輪，再用賽車科技包裝，難怪連Nigo都追捧。
潮人撐場：《Jet》總編輯金成
「RM用了好多嶄新的概念做表，攞上手好輕，打磨靚！佢本人最鍾意，就係示範隨手二三呎丟咗隻表落地！」
第10位車界SuperStar法拉利F430
以近300萬港元嘅跑車，一出已售罄，最快07年先有車交，《福布斯》更選佢為05年最佳汽車。4961c.c.引擎、500匹馬力、manettino一級方程式駕駛系統……是迄今最完美的法拉利。
潮人撐場：先入貨嘅明星車主有黎明、李雲迪。
我的05No.1
DavidAluminum老闆
「今年終於可以喺日本買到部 08吋電視機，由日本設計大師NaotoFukasawa設計，外形好舊式電視機顯像管，之前已喺《Wallpaper》見過，成萬蚊一部，我連盒都收藏得好好。」
林祥焜（漫畫家）
「呢件BountyHunter×Pushead嘅Tee，係我05年最愛，原因係兩個Icon，一向都堅持PunkRock精神，坊間話BountyHunter走下坡，但佢喺我心目中永遠都咁Punk咁潮。」
Jim（DoubleBrother老闆）
「JackPurcell白色帆布版，勝在咩衫都襯得到，趕時間出門口唔使煩，係潮人衣着必備元素之一，算係今年最滿意嘅收穫。」
洪欣榮（《Milk》周刊編輯）
「日本牌子Hare，大陸做，係平版的DiorHOMME。褸大約千餘港元，恤衫只需約百多二百元，抵買！推介牛仔褲及短身西裝褸。」
春田（《夜生活》版碟評人）
「今年最有表現係HMP力捧嘅新人伊沢千夏，樣靚！夏目奈奈亦唔錯，佢哋都各有近十套新作。我重好想講：今年南波杏令我好失望！」
