三個大男人古天樂、成龍與許冠文前晚出席新戲《BB計劃》開鏡禮,三人抱着BB時顯得手忙腳亂,令嬰兒不停哭叫,場面十分混亂。
成龍、許冠文、古天樂、應采兒及內地女星高圓圓等前晚在數碼港為新戲《BB計劃》舉行開鏡禮,只有六個月大、香港澳洲混血兒主角Matthew也有出席,加上Matthew的兩個替身BB,成龍及古仔等一人抱着一個BB出現時十分熱鬧,不過幾位男士卻雞手鴨腳,以致BB不停哭哭啼啼,場面混亂又惹笑。
造兩機械BB
前晚當幾個BB出場時,先由許冠文抱着主角小Matthew大合照,但見嬰兒已扁嘴想哭,許冠文即將BB交給成龍抱,成龍接手後,BB回頭一望,竟忍不住大哭起來,場邊的另外兩名BB亦跟着大哭,成龍惟有立即將Matthew交還其母照顧。
成龍表示有兩個機械BB還在澳洲製造中,每個價值二十萬美金(約一百五十六萬港元),代替真BB做危險動作。成龍說:「啲BB好難搞,成日喊同瞓,有時打完燈個BB就瞓着,整醒佢又喊,BB喊會傳染㗎,好嘈,我真係揦手唔成勢。」成龍坦承沒有湊過兒子祖名,他說:「我好煩躁,我冇幫過佢換片,抱佢嘅時間好少,我呢世好運,有個好嘅仔、家人同父母,父母又唔賭錢。」問成龍可有想過再生子女,他說:「𠵱家遲啦,生一個已經好煩,又唔可以公開,等我問下祖名先,可能佢會驚有人同佢爭身家呢。」
談到湊仔,許冠文說:「古仔未生,我有一仔一女,成龍都唔夠我多。」許冠文似乎忘了成龍與吳綺莉所生的女兒吳卓林,其實二人一樣有一子一女。
應采兒想生仔
應采兒表示最遲二十七、八歲便要生仔,因其母是雙胞胎,隔代遺傳的話,她也會生雙胞胎,她說:「生男仔好啲,女仔會擔心,靚又怕狂蜂浪蝶,唔靚又要供佢讀書。」應采兒謂要選靚仔和她生,問孫耀威可合格?她謂:「唔清楚,畀分嘅話佢十分有八分啦,古仔有九分,我想搵個十分嘅。」
古仔則謂自己很喜歡BB,有指他加盟華納唱片,古仔說:「我只係錄首百事廣告歌,首歌係同華納合作,我同MusicNation冇約,但冇唱片公司傾過我,我明年六月先拍晒啲戲,冇時間錄音。」
採訪:魯萍、藍文浩 攝影:林德雄