第四十屆工展會在維園開幕，有乜特色？事先想到嘅就係馬會參加工展，設攤位吸引遊客，馬會與香港工業有何關係？費事諗嘞，明年有銀行參加工展會都唔定，或者中原、美聯都會加入，乘機賣樓！
睇報紙，先知可能重有第二個特色，就係「財爺靈芝」。本來香港有好多靈芝產品在市面出售，競爭非常激烈，唐英年司長家族開設「半島靈芝」，要打入市場，咪試吓囉，相信其他靈芝生產商唔會介意。不過咁喎，報紙刊登照片，呢間半島靈芝嘅工展會攤位嘅布景板用大字寫出：「情繫香江，財爺家族留港種靈芝。」用「財爺」兩個字作招徠，香港人個個都知道「財爺」代表財政司司長，於是據記者報道，「不少市民特意到攤位詢問他們（按：即半島靈芝）與財爺的關係，可見策略奏效。」甚麼策略呀？半島靈芝市場經理甘輝泉表示，打出財爺名號只是宣傳策略之一，由於公司名氣不及市場上其他幾家有知名度的靈芝生產商，故希望靠財爺達到「名牌效應」。（以上報道見《星島日報》十二月二十八日A8版）。
廣告界老友行街鄭話：「咁嘞，不如叫財爺上埋電視，右手揸住半島靈芝，講一句『我係財爺，你唔係，財爺日日食半島靈芝！』一定收到宣傳效果！」
講笑咩，外國高官，凡來自商界嘅，就將一切投資交由一個blindtrust管理，不聞不問，點會間接為自己家族投資嘅產品賣廣告㗎？如果我係其他靈芝生產商，我可唔可以搵肥龍司長講「肥龍留港製靈芝」呢？財爺為人都幾公道嘅，佢應該立即與呢位甘輝泉經理保持距離，澄清佢與「財爺留港種靈芝」無關。
高官家族做生意，無可厚非，何況唐英年根本出身於大富之家。但啲手下應該體會領袖苦心，明知老闆已經做咗財爺，當然要知所避忌，𠵱家立法會議員時時要求「比白色更白」，郁吓就話調查是否有利益衝突，公司用「財爺」嚟打知名度，即係累親財爺名聲啫。